achchha hai dil ke sath jo roe jigar ko hum

achchhā hai dil ke saath jo ro.e jigar ko ham

bhūle hue the kyoñ nigah-e-fitna-gar ko ham

paayā use to kho ga.e ḳhud umr-bhar ko ham

vo kyā milā taras ga.e apnī ḳhabar ko ham

tum ko tumhāre husn kī dikhlā.eñge bahār

apnā sā kar sake jo tumhārī nazar ko ham

rahmat ḳhudā kī tujh pe ho ai be-ḳhudī-e-shauq

kab se talāsh karte the is rahguzar ko ham

us kī galī meñ aa ke sabhī bhūlte haiñ raah

DhūñDegā rāhbar hameñ aur rāhbar ko ham

ik naqsh-e-yās aisā hī darkār dil ko hai

phir dekh leñ bujhī huī sham-e-sahar ko ham

yārab tirī ḳhudā.ī ko ḳhatra lagā hai kyā

dekheñ kabhī to us but-e-kāfir-asar ko ham

kyā jānte the ham tū sitamgar hai is qadar

kyā dekh aa.e the tire qalb-o-jigar ko ham

is shauq meñ to aate hī jaate nazar paḌe

chhup-chhup ke dekhte haiñ tirī rahguzar ko ham

kaaTe kaTī hai kis se ḳhudāyā shab-e-firāq

tū hī dikhā.e ham ko to dekheñ sahar ko ham

vo sarf-e-nāz-e-husn thā ham mahv-e-zauq-e-dīd

vo ham ko dekhtā thā aur us kī nazar ko ham

kunj-e-qafas diyā hai to itnī sakat bhī de

toḌeñ taḌap taḌap ke har ik bāl-o-par ko ham

un kī ḳhushī yahī hai tū ġham meñ bhī ḳhush rahe

samjhā rahe haiñ der se is chashm-e-tar ko ham

ye naqsh-e-pā-e-nāz hai ik sham-e-husn kā

dil se lagā.e baiThe haiñ dāġh-e-jigar ko ham

apne junūn-e-dil kā 'junūñ' hai yahī ilaaj

laao ki sar pe Daal leñ us ḳhāk-e-dar ko ham

achchha hai dil ke sath jo roe jigar ko hum

bhule hue the kyon nigah-e-fitna-gar ko hum

paya use to kho gae KHud umr-bhar ko hum

wo kya mila taras gae apni KHabar ko hum

tum ko tumhaare husn ki dikhlaenge bahaar

apna sa kar sake jo tumhaari nazar ko hum

rahmat KHuda ki tujh pe ho ai be-KHudi-e-shauq

kab se talash karte the is rahguzar ko hum

us ki gali mein aa ke sabhi bhulte hain rah

DhunDega rahbar hamein aur rahbar ko hum

ek naqsh-e-yas aisa hi darkar dil ko hai

phir dekh len bujhi hui sham-e-sahar ko hum

yarab teri KHudai ko KHatra laga hai kya

dekhen kabhi to us but-e-kafir-asar ko hum

kya jaante the hum tu sitamgar hai is qadar

kya dekh aae the tere qalb-o-jigar ko hum

is shauq mein to aate hi jate nazar paDe

chhup-chhup ke dekhte hain teri rahguzar ko hum

kaTe kaTi hai kis se KHudaya shab-e-firaq

tu hi dikhae hum ko to dekhen sahar ko hum

wo sarf-e-naz-e-husn tha hum mahw-e-zauq-e-did

wo hum ko dekhta tha aur us ki nazar ko hum

kunj-e-qafas diya hai to itni sakat bhi de

toDen taDap taDap ke har ek baal-o-par ko hum

un ki KHushi yahi hai tu gham mein bhi KHush rahe

samjha rahe hain der se is chashm-e-tar ko hum

ye naqsh-e-pa-e-naz hai ek sham-e-husn ka

dil se lagae baiThe hain dagh-e-jigar ko hum

apne junun-e-dil ka 'junun' hai yahi ilaj

lao ki sar pe Dal len us KHak-e-dar ko hum