achchha hai isi surat-e-haalat mein rahna

achchhā hai isī sūrat-e-hālāt meñ rahnā

din shahr meñ aur raat mazāfāt meñ rahnā

har raat sitāroñ ko zamīñ par liye phirnā

har sub.h kahīñ hamd-o-munājāt meñ rahnā

is bhiiḌ meñ gard-e-dar-o-dīvār hai itnī

mumkin hī nahīñ haath kisī haat meñ rahnā

us shaḳhs kī chāhat bhī ajab hai ki hamesha

ḳhātir meñ na laanā to mudārāt meñ rahnā

ye shahr samundar ke kināre pa hai ābād

is shahr meñ rahnā bhī to auqāt meñ rahnā

ham ahl-e-tarīqat kī yahī rasm rahī hai

zindān meñ yā halqa-e-sādāt meñ rahnā

dikhnā to 'salīm' apne ravayye hī pe dikhnā

ḳhush rahnā to apnī hī kisī baat meñ rahnā

achchha hai isi surat-e-haalat mein rahna

din shahr mein aur raat mazafat mein rahna

har raat sitaron ko zamin par liye phirna

har subh kahin hamd-o-munajat mein rahna

is bhiD mein gard-e-dar-o-diwar hai itni

mumkin hi nahin hath kisi hat mein rahna

us shaKHs ki chahat bhi ajab hai ki hamesha

KHatir mein na lana to mudaraat mein rahna

ye shahr samundar ke kinare pa hai aabaad

is shahr mein rahna bhi to auqat mein rahna

hum ahl-e-tariqat ki yahi rasm rahi hai

zindan mein ya halqa-e-sadat mein rahna

dikhna to 'salim' apne rawayye hi pe dikhna

KHush rahna to apni hi kisi baat mein rahna