achchhi lagti hai mujhe is liye ghar ki surat

achchhī lagtī hai mujhe is liye ghar kī sūrat

vo mire sāmne rahte haiñ sahar kī sūrat

tū mirī āñkhoñ meñ rahtā hai gulāboñ kī tarah

dekhtā huuñ maiñ tujhe ahl-e-nazar kī sūrat

mere ehsās kī duniyā meñ ujālā ho jaa.e

kaash maiñ dekh luuñ jā kar tire dar kī sūrat

be-dhaḌak maiñ tirī mahfil meñ chalā aatā huuñ

na koī ḳhauf kī sūrat hai na Dar kī sūrat

un ke aañsū na Thahar pā.eñge ruḳhsāroñ par

dekh leñ vo jo mire dīda-e-tar kī sūrat

dhuñdlā dhuñdlā nazar aatā hai jahān-e-rangīñ

ab vo pahlī sī nahīñ shams-o-qamar kī sūrat

phuul īsār ke murjhā nahīñ sakte 'aḳhtar'

ḳhair ke sāmne phaltī nahīñ shar kī sūrat

achchhi lagti hai mujhe is liye ghar ki surat

wo mere samne rahte hain sahar ki surat

tu meri aankhon mein rahta hai gulabon ki tarah

dekhta hun main tujhe ahl-e-nazar ki surat

mere ehsas ki duniya mein ujala ho jae

kash main dekh lun ja kar tere dar ki surat

be-dhaDak main teri mahfil mein chala aata hun

na koi KHauf ki surat hai na Dar ki surat

un ke aansu na Thahar paenge ruKHsaron par

dekh len wo jo mere dida-e-tar ki surat

dhundla dhundla nazar aata hai jahan-e-rangin

ab wo pahli si nahin shams-o-qamar ki surat

phul isar ke murjha nahin sakte 'aKHtar'

KHair ke samne phalti nahin shar ki surat