achchhi nibhi butan-e-sitam-ashna ke sath

achchhī nibhī butān-e-sitam-āshnā ke saath

ab ba.ad-e-marg dekhiye kyā ho ḳhudā ke saath

jab se vo sun chuke haiñ ki ham ḳhvāb meñ chale

nīchī nigāh bhī nahīñ karte hayā ke saath

yuuñ gumrahān-e-ishq haiñ rahzan ke saath ḳhush

goyā ki ho liye haiñ kisī rahnumā ke saath

māñgoñ duā-e-marg to āmīñ kahe adū

ab un kī bad-duā hai mire mudda.ā ke saath

yuuñ kahte haiñ ki tujh ko satā.e hī jā.eñge

goyā ki mujh ko ishq hai apnī vafā ke saath

ġhairoñ ne be-dilī se mirī paa.e mudda.ā

maiñ gum huā na kyuuñ dil-e-hasrat-fazā ke saath

sharminda-e-butāñ na hue laakh laakh shukr

'sālik' ḳhudā ne ham ko uThāyā vafā ke saath

achchhi nibhi butan-e-sitam-ashna ke sath

ab baad-e-marg dekhiye kya ho KHuda ke sath

jab se wo sun chuke hain ki hum KHwab mein chale

nichi nigah bhi nahin karte haya ke sath

yun gumrahan-e-ishq hain rahzan ke sath KHush

goya ki ho liye hain kisi rahnuma ke sath

mangon dua-e-marg to aamin kahe adu

ab un ki bad-dua hai mere muddaa ke sath

yun kahte hain ki tujh ko satae hi jaenge

goya ki mujh ko ishq hai apni wafa ke sath

ghairon ne be-dili se meri pae muddaa

main gum hua na kyun dil-e-hasrat-faza ke sath

sharminda-e-butan na hue lakh lakh shukr

'salik' KHuda ne hum ko uThaya wafa ke sath