achhuta gar nahin mazmun to sada bandh lete hain

achhūtā gar nahīñ mazmūñ to saada bāñdh lete haiñ

ġhazal ik aur likhne kā irāda bāñdh lete haiñ

kahāñ qismat meñ sheroñ kī ḳhazīne ab ḳhayāloñ ke

ham aksar apnī sochoñ kā burāda bāñdh lete haiñ

vahī chāhat ki maiñ jis meñ rahā huuñ mubtalā barsoñ

ḳhayāl aayā to sochā phir i.aada bāñdh lete haiñ

gañvā dete haiñ haath aa.ī ḳhushī ko ham yūñhī aksar

mile gar ġham zarūrat se ziyāda bāñdh lete haiñ

musāfir the musāfir haiñ masāfat rach ga.ī ḳhuuñ meñ

safar kā naam le koī to jaada bāñdh lete haiñ

agarche tang rahtā hai hamesha qāfiya apnā

hamārā hausla phir bhī kushāda bāñdh lete haiñ

achhuta gar nahin mazmun to sada bandh lete hain

ghazal ek aur likhne ka irada bandh lete hain

kahan qismat mein sheron ki KHazine ab KHayalon ke

hum aksar apni sochon ka burada bandh lete hain

wahi chahat ki main jis mein raha hun mubtala barson

KHayal aaya to socha phir iada bandh lete hain

ganwa dete hain hath aai KHushi ko hum yunhi aksar

mile gar gham zarurat se ziyaada bandh lete hain

musafir the musafir hain masafat rach gai KHun mein

safar ka nam le koi to jada bandh lete hain

agarche tang rahta hai hamesha qafiya apna

hamara hausla phir bhi kushada bandh lete hain