ada ye farz suraj ka hua to hai kisi had tak

adā ye farz sūraj kā huā to hai kisī had tak

añdherī raat meñ dīpak jalā to hai kisī had tak

'ibādat pattharoñ kī ho ki puujā chāñd tāroñ kī

dil-e-insāñ meñ an-dekhā ḳhudā to hai kisī had tak

baḌe ab apne chhoToñ se jhijak kar baat karte haiñ

ki me'yār aaj rishtoñ kā girā to hai kisī had tak

davā meñ kab ye tāqat hai ga.ī sāñsoñ ko lauTā de

bharose ke liye lekin du'ā to hai kisī had tak

ta'alluq ho to aapas meñ yaqīñ behad zarūrī hai

unheñ bhī is kā andāza huā to hai kisī had tak

dil-āzārī kisī kī kar ke pachhtāvā jo hotā hai

ye pachhtāvā ba-zāt-e-ḳhud sazā to hai kisī had tak

kisī ko jab koī chāhe to bilkul Tuut kar chāhe

mujhe bhī 'hosh' ye armāñ huā to hai kisī had tak

ada ye farz suraj ka hua to hai kisi had tak

andheri raat mein dipak jala to hai kisi had tak

'ibaadat pattharon ki ho ki puja chand taron ki

dil-e-insan mein an-dekha KHuda to hai kisi had tak

baDe ab apne chhoTon se jhijak kar baat karte hain

ki me'yar aaj rishton ka gira to hai kisi had tak

dawa mein kab ye taqat hai gai sanson ko lauTa de

bharose ke liye lekin du'a to hai kisi had tak

ta'alluq ho to aapas mein yaqin behad zaruri hai

unhen bhi is ka andaza hua to hai kisi had tak

dil-azari kisi ki kar ke pachhtawa jo hota hai

ye pachhtawa ba-zat-e-KHud saza to hai kisi had tak

kisi ko jab koi chahe to bilkul Tut kar chahe

mujhe bhi 'hosh' ye arman hua to hai kisi had tak