adakari mein bhi sau karb ke pahlu nikal aae

adākārī meñ bhī sau karb ke pahlū nikal aa.e

ki fankārāna rote the magar aañsū nikal aa.e

hameñ apnī hī jānib ab safar āġhāz karnā hai

so misl-e-nik.hat-e-gul ho ke be-qābū nikal aa.e

yahī be-nām paikar husn ban jā.eñge fardā kā

suḳhan mahke agar kuchh ishq kī ḳhushbū nikal aa.e

isī ummīd par ham qatl hote aa.e haiñ ab tak

ki kab qātil ke parde meñ koī dil-jū nikal aa.e

samajhte the ki mahjūrī kī zulmat hī muqaddar hai

magar phir us kī yādoñ ke bahut jugnū nikal aa.e

diloñ ko jiit lenā is qadar āsān hī kab thā

magar ab shobade haiñ aur bahut jaadū nikal aa.e

safar kī intihā tak ek taaza aas baaqī hai

ki maiñ ye moḌ kāTūñ us taraf se tū nikal aa.e

adakari mein bhi sau karb ke pahlu nikal aae

ki fankarana rote the magar aansu nikal aae

hamein apni hi jaanib ab safar aaghaz karna hai

so misl-e-nikhat-e-gul ho ke be-qabu nikal aae

yahi be-nam paikar husn ban jaenge farda ka

suKHan mahke agar kuchh ishq ki KHushbu nikal aae

isi ummid par hum qatl hote aae hain ab tak

ki kab qatil ke parde mein koi dil-ju nikal aae

samajhte the ki mahjuri ki zulmat hi muqaddar hai

magar phir us ki yaadon ke bahut jugnu nikal aae

dilon ko jit lena is qadar aasan hi kab tha

magar ab shobade hain aur bahut jadu nikal aae

safar ki intiha tak ek taza aas baqi hai

ki main ye moD kaTun us taraf se tu nikal aae