adab ki ilm-o-fan ki ek mukammal dastan main hun

adab kī ilm-o-fan kī ik mukammal dāstāñ maiñ huuñ

maiñ urdu huuñ maiñ urdu duḳhtar-e-hindostāñ maiñ huuñ

yahāñ maiñ huuñ vahāñ maiñ huuñ ayaañ maiñ huuñ nihāñ maiñ huuñ

makīñ maiñ huuñ makāñ maiñ huuñ zamīñ maiñ huuñ zamāñ maiñ huuñ

yahī to ek jaañ do jism hone kī alāmat hai

jahāñ maiñ huuñ vahāñ tū hai jahāñ tū hai vahāñ maiñ huuñ

maiñ gul huuñ maiñ bahārāñ maiñ hī rang-o-nūr aur nik.hat

nigāh-e-dil se dekhūñ shāhkār-e-gulsitāñ maiñ huuñ

jahāñ kī be-ruḳhī se tum kabhī māyūs mat honā

tumhārā āshnā maiñ huuñ tumhārā qadr-dāñ maiñ huuñ

tujhe ye naaz terī sar-zamīñ hai gulshan-e-jannat

mujhe ye faḳhr hai bāshinda-e-hindostāñ maiñ huuñ

maiñ 'anvar' huuñ mujhe samjho mujhe dekho paḌho mujh ko

har ik majmūa-e-ulfat kā kāmil tarjumāñ maiñ huuñ

adab ki ilm-o-fan ki ek mukammal dastan main hun

main urdu hun main urdu duKHtar-e-hindostan main hun

yahan main hun wahan main hun ayan main hun nihan main hun

makin main hun makan main hun zamin main hun zaman main hun

yahi to ek jaan do jism hone ki alamat hai

jahan main hun wahan tu hai jahan tu hai wahan main hun

main gul hun main bahaaran main hi rang-o-nur aur nikhat

nigah-e-dil se dekhun shahkar-e-gulsitan main hun

jahan ki be-ruKHi se tum kabhi mayus mat hona

tumhaara aashna main hun tumhaara qadr-dan main hun

tujhe ye naz teri sar-zamin hai gulshan-e-jannat

mujhe ye faKHr hai bashinda-e-hindostan main hun

main 'anwar' hun mujhe samjho mujhe dekho paDho mujh ko

har ek majmua-e-ulfat ka kaamil tarjuman main hun