adab se zikr mera majnun-o-farhad karte hain

adab se zikr merā majnūñ-o-farhād karte haiñ

mirī shāgirdī par ai ishq faḳhr ustād karte haiñ

tamanna thī kabhī ye aa ke kahtā chobdār un kā

uTho jaldī chalo sarkār tum ko yaad karte haiñ

tumhāre ḳhuftagān-e-ḳhāk kā hai ik judā aalam

na.ī duniyā ye sab zer-e-zamīñ ābād karte haiñ

hameñ to dekhnā hai un kī bazm-e-nāz meñ chal kar

kise vo shaad karte haiñ kise nāshād karte haiñ

gale kaTvā ke vo nāla-kashoñ kī jaan lete haiñ

nayā shahr-e-ḳhamoshāñ in dinoñ ābād karte haiñ

hasīnoñ kī jafā hai tāziyāna ham ko ġhaflat kā

butoñ ke zulm par apne ḳhudā ko yaad karte haiñ

na thā kuchh duur gulshan bhī qafas hī le ke uḌ jaate

magar pās-o-lihāz-e-ḳhātir-e-sayyād karte haiñ

ḳhabar detī haiñ aa aa kar ye mujh ko hichkiyāñ merī

mubārak ho tumheñ bhūle jo the vo yaad karte haiñ

falak ke siine se bhī paar hoñge tiir aahoñ ke

farishtoñ se kaho haT jaa.eñ ham fariyād karte haiñ

khaḌe haiñ der se ham intizār-e-hukm-e-ālī meñ

hamāre haq meñ āḳhir aap kyā irshād karte haiñ

vufūr-e-ġham se bachchoñ kī tarah ham rone lagte haiñ

kabhī piirī meñ jab apnī javānī yaad karte haiñ

laḌakpan meñ paḌhā thā bāb-e-panjum jo gulistāñ kā

'shahīr' ab aap piirī meñ use kyoñ yaad karte haiñ

adab se zikr mera majnun-o-farhad karte hain

meri shagirdi par ai ishq faKHr ustad karte hain

tamanna thi kabhi ye aa ke kahta chobdar un ka

uTho jaldi chalo sarkar tum ko yaad karte hain

tumhaare KHuftagan-e-KHak ka hai ek juda aalam

nai duniya ye sab zer-e-zamin aabaad karte hain

hamein to dekhna hai un ki bazm-e-naz mein chal kar

kise wo shad karte hain kise nashad karte hain

gale kaTwa ke wo nala-kashon ki jaan lete hain

naya shahr-e-KHamoshan in dinon aabaad karte hain

hasinon ki jafa hai taziyana hum ko ghaflat ka

buton ke zulm par apne KHuda ko yaad karte hain

na tha kuchh dur gulshan bhi qafas hi le ke uD jate

magar pas-o-lihaz-e-KHatir-e-sayyaad karte hain

KHabar deti hain aa aa kar ye mujh ko hichkiyan meri

mubarak ho tumhein bhule jo the wo yaad karte hain

falak ke sine se bhi par honge tir aahon ke

farishton se kaho haT jaen hum fariyaad karte hain

khaDe hain der se hum intizar-e-hukm-e-ali mein

hamare haq mein aaKHir aap kya irshad karte hain

wufur-e-gham se bachchon ki tarah hum rone lagte hain

kabhi piri mein jab apni jawani yaad karte hain

laDakpan mein paDha tha bab-e-panjum jo gulistan ka

'shahir' ab aap piri mein use kyon yaad karte hain