adam ke sath khaDe hain wajud kuchh bhi nahin

adam ke saath khaḌe haiñ vajūd kuchh bhī nahīñ

ye zindagī hai faqat khel-kūd kuchh bhī nahīñ

hameñ to ranj kī daulat ne mālā-māl kiyā

use malāl ki ye sharh-e-sūd kuchh bhī nahīñ

ḳhudā kā shukr hai sab ūñch-nīch ḳhatm huī

zamīñ ke nīche to nām-o-numūd kuchh bhī nahīñ

ham apne paaoñ kī zanjīr aap the varna

ye zābte ye hudūd-o-quyūd kuchh bhī nahīñ

bas intizār thā āñkhoñ ke band hone kā

hameñ ḳhabar thī ki ye hast-o-būd kuchh bhī nahīñ

vo apne aap se rāh-e-farār thī varna

junūn kuchh bhī nahīñ hai jumūd kuchh bhī nahīñ

mire gale meñ hai ta.avīz us kī bāñhoñ kā

vo jis ke sāmne ye dam darūd kuchh bhī nahīñ

bhaḌakte shāloñ se hargiz dhuāñ nahīñ uThnā

ye aag aag sarāsar hai duud kuchh bhī nahīñ

hamārī ḳhud se adāvat hai vo ḳhudā kī panāh

muqāble meñ yahūd-o-hunūd kuchh bhī nahīñ

amal kā saarā hai dār-o-madār niyyat par

baġhair is ke rukū-o-sujūd kuchh bhī nahīñ

adam ke sath khaDe hain wajud kuchh bhi nahin

ye zindagi hai faqat khel-kud kuchh bhi nahin

hamein to ranj ki daulat ne mala-mal kiya

use malal ki ye sharh-e-sud kuchh bhi nahin

KHuda ka shukr hai sab unch-nich KHatm hui

zamin ke niche to nam-o-numud kuchh bhi nahin

hum apne paon ki zanjir aap the warna

ye zabte ye hudud-o-quyud kuchh bhi nahin

bas intizar tha aankhon ke band hone ka

hamein KHabar thi ki ye hast-o-bud kuchh bhi nahin

wo apne aap se rah-e-farar thi warna

junun kuchh bhi nahin hai jumud kuchh bhi nahin

mere gale mein hai tawiz us ki banhon ka

wo jis ke samne ye dam darud kuchh bhi nahin

bhaDakte shaalon se hargiz dhuan nahin uThna

ye aag aag sarasar hai dud kuchh bhi nahin

hamari KHud se adawat hai wo KHuda ki panah

muqable mein yahud-o-hunud kuchh bhi nahin

amal ka sara hai dar-o-madar niyyat par

baghair is ke ruku-o-sujud kuchh bhi nahin