adil-e-waqt amiron ke zar pe palta raha

adīl-e-vaqt amīroñ ke zar pe paltā rahā

jabhī to mulk meñ zālim kā ro.ab chhāyā rahā

tamām pyāsoñ ne dariyā kā ruḳh kiyā aur maiñ

tumhāre aañsū hathelī pe le ke baiThā rahā

bahut se log bhulā.e pe vo nahīñ bhūlā

ka.ī sitāre bujhe par vo chāñd jaltā rahā

tabīb baḌhte ga.e aur marīz marte rahe

darūn-e-shahr yahī kārobār chaltā rahā

havā-e-tez mire zehn se guzartī rahī

maiñ terī yaad ke saare diye bachātā rahā

ye dhuup vaqt se pahle tapish gañvātī rahī

musāfiroñ kā safar meñ shabāb Dhaltā rahā

ye merī maañ kī duā hai jabhī to zindagī meñ

bahut sī Thokareñ khā.īñ magar sañbhaltā rahā

adil-e-waqt amiron ke zar pe palta raha

jabhi to mulk mein zalim ka roab chhaya raha

tamam pyason ne dariya ka ruKH kiya aur main

tumhaare aansu hatheli pe le ke baiTha raha

bahut se log bhulae pe wo nahin bhula

kai sitare bujhe par wo chand jalta raha

tabib baDhte gae aur mariz marte rahe

darun-e-shahr yahi karobar chalta raha

hawa-e-tez mere zehn se guzarti rahi

main teri yaad ke sare diye bachata raha

ye dhup waqt se pahle tapish ganwati rahi

musafiron ka safar mein shabab Dhalta raha

ye meri man ki dua hai jabhi to zindagi mein

bahut si Thokaren khain magar sanbhalta raha