adna si ek chiz wafa jis ka nam hai

adnā sī ek chiiz vafā jis kā naam hai

hai to vo ek soz magar nā-tamām hai

mujh ko haqīqatoñ kī ḳhabar hai mire shu.ūr

lekin jo intizām hai vo intizām hai

ye ahl-e-eqtidār haiñ do chaar roz ke

ham haiñ hameñ to jiinā hai ham ko davām hai

gustāḳh jāntā hai mujhe ek aisā shaḳhs

jis kā mirī nazar meñ bahut ehtirām hai

maiñ us kī khoj meñ huuñ vo merī talāsh meñ

mujh ko hai us se kaam use mujh se kaam hai

raahī safar ke tuul se ghabrā rahā hai kyoñ

do chaar gaam aur ki phir iḳhtitām hai

jiinā hai achchhī baat hai jiinā isī liye

in ko bhī raam raam unheñ bhī salām hai

adna si ek chiz wafa jis ka nam hai

hai to wo ek soz magar na-tamam hai

mujh ko haqiqaton ki KHabar hai mere shuur

lekin jo intizam hai wo intizam hai

ye ahl-e-eqtidar hain do chaar roz ke

hum hain hamein to jina hai hum ko dawam hai

gustaKH jaanta hai mujhe ek aisa shaKHs

jis ka meri nazar mein bahut ehtiram hai

main us ki khoj mein hun wo meri talash mein

mujh ko hai us se kaam use mujh se kaam hai

rahi safar ke tul se ghabra raha hai kyon

do chaar gam aur ki phir iKHtitam hai

jina hai achchhi baat hai jina isi liye

in ko bhi ram ram unhen bhi salam hai