adu ke shahr mein kab be-asar hun

adū ke shahr meñ kab be-asar huuñ

ḳhudā kā shukr hai jo mo'atabar huuñ

sitāra huuñ ki maiñ raushan qamar huuñ

duā maañ kī hai jis kā maiñ samar huuñ

bahāreñ kyuuñ na phir se lauT aa.eñ

unheñ ma.alūm hai maiñ bhī idhar huuñ

isī sahrā se merī nisbateñ haiñ

jahāñ kā maiñ hī ik vāhid shajar huuñ

mohabbat jurm hai kis ne kahā hai

batā do sab ko maiñ dil meñ agar huuñ

balā kā hausla mujh ko milā hai

bahut dushvār hai rasta jidhar huuñ

jise sun kar sabhī hairān haiñ kyuuñ

tumheñ lagtā hai maiñ aisī ḳhabar huuñ

darīche meñ jo rakkhā jal rahā hai

diyā aisā havā ke dosh par huuñ

bulandī chhū ke aa.uuñ āsmāñ kī

parinda huuñ sadā mahv-e-safar huuñ

tumhāre ahd kī huuñ munharif to

sazā mil kar rahegī bā-ḳhabar huuñ

adu ke shahr mein kab be-asar hun

KHuda ka shukr hai jo mo'atabar hun

sitara hun ki main raushan qamar hun

dua man ki hai jis ka main samar hun

bahaaren kyun na phir se lauT aaen

unhen malum hai main bhi idhar hun

isi sahra se meri nisbaten hain

jahan ka main hi ek wahid shajar hun

mohabbat jurm hai kis ne kaha hai

bata do sab ko main dil mein agar hun

bala ka hausla mujh ko mila hai

bahut dushwar hai rasta jidhar hun

jise sun kar sabhi hairan hain kyun

tumhein lagta hai main aisi KHabar hun

dariche mein jo rakkha jal raha hai

diya aisa hawa ke dosh par hun

bulandi chhu ke aaun aasman ki

parinda hun sada mahw-e-safar hun

tumhaare ahd ki hun munharif to

saza mil kar rahegi ba-KHabar hun