afkar ke sanche mein Dhali taza ghazal hai

afkār ke sāñche meñ Dhalī taaza ġhazal hai

yā vaqt ke pechīda savālāt kā hal hai

ye sañg kī buniyād pe ta.amīr na hogā

ye mere taḳhayyul kā hasīñ shīsh-mahal hai

maiñ apnī mohabbat kā badal DhūñD rahā huuñ

vo kaun hai jo merī mohabbat kā badal hai

ai tār-e-nafas TuuT bhī jā der na kar ab

ehsās kī bālīñ pe khaḌī kab se ajal hai

jo arsa-e-māzī hai muarriḳh kī nazar meñ

shā.ir kī nigāhoñ meñ vo guzrā huā pal hai

jo hijr ke mausam meñ khule daaġh kī sūrat

vo phuul ba-alfāz-e-digar aag kā phal hai

maiñ dars-e-tahammul huuñ 'sabā' rāh-e-talab meñ

duniyā ye samajhtī hai ki baazū mirā shal hai

afkar ke sanche mein Dhali taza ghazal hai

ya waqt ke pechida sawalat ka hal hai

ye sang ki buniyaad pe tamir na hoga

ye mere taKHayyul ka hasin shish-mahal hai

main apni mohabbat ka badal DhunD raha hun

wo kaun hai jo meri mohabbat ka badal hai

ai tar-e-nafas TuT bhi ja der na kar ab

ehsas ki baalin pe khaDi kab se ajal hai

jo arsa-e-mazi hai muarriKH ki nazar mein

shair ki nigahon mein wo guzra hua pal hai

jo hijr ke mausam mein khule dagh ki surat

wo phul ba-alfaz-e-digar aag ka phal hai

main dars-e-tahammul hun 'saba' rah-e-talab mein

duniya ye samajhti hai ki bazu mera shal hai