afsana-dar-afsana ho afsana kisi ka

afsāna-dar-afsāna ho afsāna kisī kā

allāh banā de unheñ dīvāna kisī kā

bastī thī kisī kī na ye vīrāna kisī kā

jā.egā jahāñ chāhegā dīvāna kisī kā

jis shai pe nazar kī mai-e-sarshār thī goyā

mad.hosh huā jaatā hai mastāna kisī kā

kyā shauq thā shaidā-e-sar-e-tūr ko lekin

dekhā na gayā jalva-e-jānāna kisī kā

tū kaun hai maiñ kaun huuñ kyā tujh ko batā.ūñ maiñ

hai merī haqīqat bhī to afsāna kisī kā

chheḌoge na jab tak ġham-e-gesū-e-hikāyat

mānegā na zanjīr ko dīvāna kisī kā

kyoñ shaiḳh-e-haram kuchh tirī āñkhoñ ne bhī dekhā

kā'ba bhī banā jaatā hai but-ḳhāna kisī kā

kasrat meñ bhī nairangī-e-vahdat ke haiñ jalve

chhuptā hai kahīñ rang-e-judāgāna kisī kā

sadqe tirī in jām-numā āñkhoñ pe saaqī

bhar de inhīñ paimānoñ se paimāna kisī kā

begāna vo kyoñ hosh-e-do-ālam se na rahtā

dīvāna nahīñ thā koī dīvāna kisī kā

ḳhud sham.a banā jaatā hai ye soz to dekho

jaltā hai to bujhtā nahīñ parvāna kisī kā

hotā hai to ho jaa.e fidā qadmoñ pe us ke

muñh dekhe na ab himmat-e-mardāna kisī kā

ādāb-e-mohabbat meñ nahīñ daḳhl-e-sharī.at

lāzim hai 'junūñ' sajda-e-yazdāna kisī kā

afsana-dar-afsana ho afsana kisi ka

allah bana de unhen diwana kisi ka

basti thi kisi ki na ye virana kisi ka

jaega jahan chahega diwana kisi ka

jis shai pe nazar ki mai-e-sarshaar thi goya

madhosh hua jata hai mastana kisi ka

kya shauq tha shaida-e-sar-e-tur ko lekin

dekha na gaya jalwa-e-jaanana kisi ka

tu kaun hai main kaun hun kya tujh ko bataun main

hai meri haqiqat bhi to afsana kisi ka

chheDoge na jab tak gham-e-gesu-e-hikayat

manega na zanjir ko diwana kisi ka

kyon shaiKH-e-haram kuchh teri aankhon ne bhi dekha

ka'ba bhi bana jata hai but-KHana kisi ka

kasrat mein bhi nairangi-e-wahdat ke hain jalwe

chhupta hai kahin rang-e-judagana kisi ka

sadqe teri in jam-numa aankhon pe saqi

bhar de inhin paimanon se paimana kisi ka

begana wo kyon hosh-e-do-alam se na rahta

diwana nahin tha koi diwana kisi ka

KHud shama bana jata hai ye soz to dekho

jalta hai to bujhta nahin parwana kisi ka

hota hai to ho jae fida qadmon pe us ke

munh dekhe na ab himmat-e-mardana kisi ka

aadab-e-mohabbat mein nahin daKHl-e-shariat

lazim hai 'junun' sajda-e-yazdana kisi ka