afsana duhrane se kya hota hai

afsāna duhrāne se kyā hotā hai

is be-rahm zamāne se kyā hotā hai

Tīseñ kitnī dāġhoñ meñ rah jaatī haiñ

zaḳhmoñ ke bhar jaane se kyā hotā hai

ek qalam aur be-pāyāñ ehsās-e-darūñ

lafzoñ ke paimāne se kyā hotā hai

tahrīk-e-sīmāb-sifat ke pairoñ meñ

zanjīreñ pahnāne se kyā hotā hai

dariyā jab chāhe sāhil ko le Duube

ūñchā band banāne se kyā hotā hai

chhat par rahne vaale shāyad bhuul ga.e

buniyādeñ hil jaane se kyā hotā hai

laġhzish kā anjām kise mā'lūm nahīñ

ā.īna gir jaane se kyā hotā hai

ḳhushbū zinda hai to koī baat nahīñ

phūloñ ke mar jaane se kyā hotā hai

sachchā.ī par harf nahīñ aatā 'irfān'

afvāheñ phailāne se kyā hotā hai

afsana duhrane se kya hota hai

is be-rahm zamane se kya hota hai

Tisen kitni daghon mein rah jati hain

zaKHmon ke bhar jaane se kya hota hai

ek qalam aur be-payan ehsas-e-darun

lafzon ke paimane se kya hota hai

tahrik-e-simab-sifat ke pairon mein

zanjiren pahnane se kya hota hai

dariya jab chahe sahil ko le Dube

uncha band banane se kya hota hai

chhat par rahne wale shayad bhul gae

buniyaaden hil jaane se kya hota hai

laghzish ka anjam kise ma'lum nahin

aaina gir jaane se kya hota hai

KHushbu zinda hai to koi baat nahin

phulon ke mar jaane se kya hota hai

sachchai par harf nahin aata 'irfan'

afwahen phailane se kya hota hai