afsana-e-dil kya tum se kahen kuchh shad bhi kuchh nashad bhi hai

afsāna-e-dil kyā tum se kaheñ kuchh shaad bhī kuchh nāshād bhī hai

ye fikr-o-nazar kā qaidī hai is qaid meñ ye āzād bhī hai

is nisbat-e-ām kī duniyā meñ ab kis kī shikāyat kis se kareñ

kuchh ham bhī haiñ barbād-e-jahāñ kuchh ham se jahāñ barbād bhī hai

afsos tasalsul-e-zulf-o-ruḳh is shām-o-sahar ne toḌ diyā

be-rabt sā hai ab qissa-e-dil kuchh bhuul ga.e kuchh yaad bhī hai

ai kaash nigāh-e-shauq tujhe kuchh aur salīqa mil jaatā

kuchh zīnat-e-husn to hotī hai kuchh sa.ī-e-nazar barbād bhī hai

is dil kī tabāhī meñ shāmil kuchh un kī nigāh-e-lutf bhī hai

kuchh apne mizāj-o-tabī.at kī māyūsī-o-ġham uftād bhī hai

be-shub.h 'shafīq' ye terī ġhazal is mahv-e-tarab tak pahuñchegī

ye soz meñ Duubā sāz-e-hasīñ ik naġhma bhī hai fariyād bhī hai

afsana-e-dil kya tum se kahen kuchh shad bhi kuchh nashad bhi hai

ye fikr-o-nazar ka qaidi hai is qaid mein ye aazad bhi hai

is nisbat-e-am ki duniya mein ab kis ki shikayat kis se karen

kuchh hum bhi hain barbaad-e-jahan kuchh hum se jahan barbaad bhi hai

afsos tasalsul-e-zulf-o-ruKH is sham-o-sahar ne toD diya

be-rabt sa hai ab qissa-e-dil kuchh bhul gae kuchh yaad bhi hai

ai kash nigah-e-shauq tujhe kuchh aur saliqa mil jata

kuchh zinat-e-husn to hoti hai kuchh sai-e-nazar barbaad bhi hai

is dil ki tabahi mein shamil kuchh un ki nigah-e-lutf bhi hai

kuchh apne mizaj-o-tabiat ki mayusi-o-gham uftad bhi hai

be-shubh 'shafiq' ye teri ghazal is mahw-e-tarab tak pahunchegi

ye soz mein Duba saz-e-hasin ek naghma bhi hai fariyaad bhi hai