afsos kya jo hum bhi tumhaare nahin rahe

afsos kyā jo ham bhī tumhāre nahīñ rahe

tum bhī kisī ke ho ke hamāre nahīñ rahe

ab shikva-e-fareb-e-mohabbat na kījiye

ham bhī kisī kī aañkh ke taare nahīñ rahe

ye husn-e-ittifāq hai phir mil ga.e haiñ vo

ye aur baat hai ki hamāre nahīñ rahe

tum bhī ta.alluqāt kī had se guzar ga.e

ham bhī kisī ko jaan se pyāre nahīñ rahe

jab se chale ga.e vo bahāroñ ko luuT kar

husn-e-bahār ke vo nazāre nahīñ rahe

ham jin ke ho ga.e the zamāne ko chhoḌ kar

qismat to dekhiye vo hamāre nahīñ rahe

sher-o-suḳhan kī mahfiloñ kī raunaqeñ ga.iiñ

chhajje nahīñ rahe vo chaubāre nahīñ rahe

merī murād kā hai safīna bhī nā-murād

tūfān ruk gayā to kināre nahīñ rahe

vo chashm-e-sharmgīñ kī fusūñ-kāriyāñ ga.iiñ

vo chashm-e-surmagīñ ke ishāre nahīñ rahe

shāloñ meñ ishq ke bhī vo chiñgāriyāñ nahīñ

bas aag rah ga.ī hai sharāre nahīñ rahe

jaate hue vo sabr-o-sukūñ saath le gayā

bahte hue sukūn ke dhāre nahīñ rahe

rānā.ī-e-jamāl-e-gul-afshāñ kī ḳhair ho

ab husn-e-dilrubā ke nazāre nahīñ rahe

dil ko thā ibtidā-e-mohabbat meñ jin pe naaz

vo apnī zindagī ke sahāre nahīñ rahe

be-nūr kar gayā koī duniyā ko 'soz' kī

vo chāñd chhup gayā vo sitāre nahīñ rahe

afsos kya jo hum bhi tumhaare nahin rahe

tum bhi kisi ke ho ke hamare nahin rahe

ab shikwa-e-fareb-e-mohabbat na kijiye

hum bhi kisi ki aankh ke tare nahin rahe

ye husn-e-ittifaq hai phir mil gae hain wo

ye aur baat hai ki hamare nahin rahe

tum bhi talluqat ki had se guzar gae

hum bhi kisi ko jaan se pyare nahin rahe

jab se chale gae wo bahaaron ko luT kar

husn-e-bahaar ke wo nazare nahin rahe

hum jin ke ho gae the zamane ko chhoD kar

qismat to dekhiye wo hamare nahin rahe

sher-o-suKHan ki mahfilon ki raunaqen gain

chhajje nahin rahe wo chaubare nahin rahe

meri murad ka hai safina bhi na-murad

tufan ruk gaya to kinare nahin rahe

wo chashm-e-sharmgin ki fusun-kariyan gain

wo chashm-e-surmagin ke ishaare nahin rahe

shaalon mein ishq ke bhi wo chingariyan nahin

bas aag rah gai hai sharare nahin rahe

jate hue wo sabr-o-sukun sath le gaya

bahte hue sukun ke dhaare nahin rahe

ranai-e-jamal-e-gul-afshan ki KHair ho

ab husn-e-dilruba ke nazare nahin rahe

dil ko tha ibtida-e-mohabbat mein jin pe naz

wo apni zindagi ke sahaare nahin rahe

be-nur kar gaya koi duniya ko 'soz' ki

wo chand chhup gaya wo sitare nahin rahe