agar arbab-e-gulshan mein wafaon ke chalan hote

agar arbāb-e-gulshan meñ vafāoñ ke chalan hote

shikanje meñ na phir sayyād ke ahl-e-chaman hote

masā.il kā ḳhulūs-e-dil se mil kar faisla karte

to itnī kashmakash meñ kyoñ ye shaiḳh-o-barhaman hote

kabhī hañs kar na sunte phir mirā afsāna-e-ġhamgīñ

jo tum bhī mubtalā-e-gardish-e-ranj-o-mehan hote

tumhārī bazm-e-rangīñ to nazar ko ḳhīra kartī hai

kahīñ aise meñ tum bhī is jagah jalva-fagan hote

hasīñ dhoke meñ rahbar ke jo aa jaate na ai hamdam

na ham be-ḳhānumāñ hote na ham phir be-vatan hote

tasadduq meñ ḳhush-ilhānī ke shā'ir ban ga.e varna

kahāñ mumkin thā tum vābasta-e-ahl-e-suḳhan hote

vafādārī jo apnī jurm ban jaatī na ai 'ishrat'

ġham-e-zindāñ na hotā aur na ye dār-o-rasan hote

agar arbab-e-gulshan mein wafaon ke chalan hote

shikanje mein na phir sayyaad ke ahl-e-chaman hote

masail ka KHulus-e-dil se mil kar faisla karte

to itni kashmakash mein kyon ye shaiKH-o-barhaman hote

kabhi hans kar na sunte phir mera afsana-e-ghamgin

jo tum bhi mubtala-e-gardish-e-ranj-o-mehan hote

tumhaari bazm-e-rangin to nazar ko KHira karti hai

kahin aise mein tum bhi is jagah jalwa-fagan hote

hasin dhoke mein rahbar ke jo aa jate na ai hamdam

na hum be-KHanuman hote na hum phir be-watan hote

tasadduq mein KHush-ilhani ke sha'ir ban gae warna

kahan mumkin tha tum wabasta-e-ahl-e-suKHan hote

wafadari jo apni jurm ban jati na ai 'ishrat'

gham-e-zindan na hota aur na ye dar-o-rasan hote