agar arz-e-tamanna ko faqat lutf-e-zaban samjha

agar arz-e-tamannā ko faqat lutf-e-zabāñ samjhā

to phir ai sunñe vaale ḳhaak merī dāstāñ samjhā

na phūloñ kī hañsī dekhī na bulbul kī fuġhāñ samjhā

chaman kā raaz phir kis muñh se kahtā hai ki haañ samjhā

ye merī ḳhud-farebī hai ki majbūrī ḳhudā jaane

maiñ sahrā ko chaman samjhā qafas ko āshiyāñ samjhā

samā.e husn-e-gul kyā us nigāh-e-sho.ala-parvar meñ

ki jis ne barq-e-tābāñ ko charāġh-e-āshiyāñ samjhā

banā deñ phuul kāñToñ ko guloñ meñ bijliyāñ bhar deñ

chaman meñ dil-jale aise bhī haiñ ai bāġhbāñ samjhā

yahāñ kā zarra zarra āsmāñ kī chaal chaltā hai

zamīn-e-kū-e-jānāñ ko dil-e-vahshī kahāñ samjhā

kiyā ifshā-e-rāz-e-husn har tasvīr kahtī hai

ġhalat samjhā 'musavvir' ko jo tum ne rāz-dāñ samjhā

agar arz-e-tamanna ko faqat lutf-e-zaban samjha

to phir ai sunne wale KHak meri dastan samjha

na phulon ki hansi dekhi na bulbul ki fughan samjha

chaman ka raaz phir kis munh se kahta hai ki han samjha

ye meri KHud-farebi hai ki majburi KHuda jaane

main sahra ko chaman samjha qafas ko aashiyan samjha

samae husn-e-gul kya us nigah-e-shoala-parwar mein

ki jis ne barq-e-taban ko charagh-e-ashiyan samjha

bana den phul kanTon ko gulon mein bijliyan bhar den

chaman mein dil-jale aise bhi hain ai baghban samjha

yahan ka zarra zarra aasman ki chaal chalta hai

zamin-e-ku-e-jaanan ko dil-e-wahshi kahan samjha

kiya ifsha-e-raaz-e-husn har taswir kahti hai

ghalat samjha 'musawwir' ko jo tum ne raaz-dan samjha