agar charagh bhi aandhi se Dar gae hote

agar charāġh bhī āñdhī se Dar ga.e hote

to sochiye ki ujāle kidhar ga.e hote

ye mere dost mire chāra-gar mire ahbāb

na chheḌte to mire zaḳhm bhar ga.e hote

koī nigāh jo apnī bhī muntazir hotī

to ham bhī shaam Dhale apne ghar ga.e hote

agar vo merī ayādat ko aa gayā hotā

to dostoñ ke bhī chehre utar ga.e hote

hameñ to shauq-e-suḳhan ne sameT rakkhā hai

vagarna ham to kabhī ke bikhar ga.e hote

unheñ bhī mujh se mohabbat to hai 'nafas' lekin

maiñ pūchhtā to yaqīnan mukar ga.e hote

agar charagh bhi aandhi se Dar gae hote

to sochiye ki ujale kidhar gae hote

ye mere dost mere chaara-gar mere ahbab

na chheDte to mere zaKHm bhar gae hote

koi nigah jo apni bhi muntazir hoti

to hum bhi sham Dhale apne ghar gae hote

agar wo meri ayaadat ko aa gaya hota

to doston ke bhi chehre utar gae hote

hamein to shauq-e-suKHan ne sameT rakkha hai

wagarna hum to kabhi ke bikhar gae hote

unhen bhi mujh se mohabbat to hai 'nafas' lekin

main puchhta to yaqinan mukar gae hote