agar dast-e-junun masruf-e-ehsan aur ho jata

agar dast-e-junūñ masrūf-e-ehsāñ aur ho jaatā

vaqār-e-dāman-o-jaib-o-garebāñ aur ho jaatā

muqaddar se mirī vahshat kā sāmāñ aur ho jaatā

gulistāñ aur ho jaatā bayābāñ aur ho jaatā

jo ahl-e-misr dāman thaam lete husn-e-yūsuf kā

na kuchh qaidī badal jaatā na zindāñ aur ho jaatā

tabī.at bhī agar āsūda-e-tīr-e-sitam hotī

gumān-e-indimāl-e-zaḳhm-e-paikāñ aur ho jaatā

jo masjid se nikal kar aap sū-e-mai-kada aate

janāb-e-shaiḳh lutf-e-dīn-o-īmāñ aur ho jaatā

junūn-e-ishq kī takmīl imkāñ meñ agar hotī

to dāman aur ho jaatā garebāñ aur ho jaatā

Tapaktā shām-e-furqat saath ashkoñ ke lahū dil kā

ye ehsāñ terā mujh par chashm-e-giryāñ aur ho jaatā

kamī kyoñ kī bahut nazdīk thī manzil garebāñ kī

rasā kambaḳht apnā dast-e-imkāñ aur ho jaatā

bayābān-e-mohabbat meñ na hotī kashmakash itnī

agar ābād dīvānoñ se zindāñ aur ho jaatā

rag-e-gardan agar 'mas.ūd' teġh-e-kund se kaTtī

mire qātil kā mujh par bār-e-ehsāñ aur ho jaatā

agar dast-e-junun masruf-e-ehsan aur ho jata

waqar-e-daman-o-jaib-o-gareban aur ho jata

muqaddar se meri wahshat ka saman aur ho jata

gulistan aur ho jata bayaban aur ho jata

jo ahl-e-misr daman tham lete husn-e-yusuf ka

na kuchh qaidi badal jata na zindan aur ho jata

tabiat bhi agar aasuda-e-tir-e-sitam hoti

guman-e-indimal-e-zaKHm-e-paikan aur ho jata

jo masjid se nikal kar aap su-e-mai-kada aate

janab-e-shaiKH lutf-e-din-o-iman aur ho jata

junun-e-ishq ki takmil imkan mein agar hoti

to daman aur ho jata gareban aur ho jata

Tapakta sham-e-furqat sath ashkon ke lahu dil ka

ye ehsan tera mujh par chashm-e-giryan aur ho jata

kami kyon ki bahut nazdik thi manzil gareban ki

rasa kambaKHt apna dast-e-imkan aur ho jata

bayaban-e-mohabbat mein na hoti kashmakash itni

agar aabaad diwanon se zindan aur ho jata

rag-e-gardan agar 'masud' tegh-e-kund se kaTti

mere qatil ka mujh par bar-e-ehsan aur ho jata