agar dil ishq ke anwar se mamur ho jae

agar dil ishq ke anvār se ma.amūr ho jaa.e

to phir ye zarra ḳhud rashk-e-charāġh-e-tūr ho jaa.e

tum apne jalva-e-nauḳhez par yuuñ naaz karte ho

agar merā dil-e-ḳhuddār bhī maġhrūr ho jaa.e

faqat is raaz ko ahl-e-mohabbat hī samajhte haiñ

mayassar aa.e jitnā qurb itnā duur ho jaa.e

mujhe ye zid ki un ke rū-e-zebā se naqāb uTThe

unheñ ye zid ki jalva aur bhī mastūr ho jaa.e

vo mere dil ke gulshan meñ agar aa jaa.e ai 'jauhar'

to har ik nā-shagufta ġhuncha rañg-o-nūr ho jaa.e

agar dil ishq ke anwar se mamur ho jae

to phir ye zarra KHud rashk-e-charagh-e-tur ho jae

tum apne jalwa-e-nauKHez par yun naz karte ho

agar mera dil-e-KHuddar bhi maghrur ho jae

faqat is raaz ko ahl-e-mohabbat hi samajhte hain

mayassar aae jitna qurb itna dur ho jae

mujhe ye zid ki un ke ru-e-zeba se naqab uTThe

unhen ye zid ki jalwa aur bhi mastur ho jae

wo mere dil ke gulshan mein agar aa jae ai 'jauhar'

to har ek na-shagufta ghuncha rang-o-nur ho jae