agar gham ki hui yun kar-farmai to kya hoga

agar ġham kī huī yuuñ kār-farmā.ī to kyā hogā

rahī hote hue bhī un ke tanhā.ī to kyā hogā

junūñ ke rāste meñ gar ḳhirad aa.ī to kyā hogā

nazar merī hī mere dil se Takrā.ī to kyā hogā

ḳhushī ġham kī nazākat ko na raas aa.ī to kyā hogā

tirī āġhosh meñ bhī ruuh ghabrā.ī to kyā hogā

mubārak hoñ tabassum ko tire ye karvaTeñ lekin

mire ashkoñ ne le lī koī añgḌā.ī to kyā hogā

nigāh-e-muztarib ko laakh Thahrā leñ to kyā hāsil

tajallī ḳhud nazar ban kar jo tharrā.ī to kyā hogā

jhukā deñ ham to sar saaqī tire gul-rang jāmoñ par

baġhāvat kī jo koī mauj ubhar aa.ī to kyā hogā

musallam zauq-e-āzādī bhī ādāb-e-asīrī bhī

qafas tak uḌ ke ḳhāk-e-āshiyāñ aa.ī to kyā hogā

guloñ kī dhaḌkaneñ to jazb kar lā.ūñgā gulshan se

kisī ġhunche kī lekin aañkh bhar aa.ī to kyā hogā

ba-sa.ī-e-ehtiyāt-e-zauq-e-nazzāra bhī mahfil meñ

'shifā' merī nazar sab ko nazar aa.ī to kyā hogā

agar gham ki hui yun kar-farmai to kya hoga

rahi hote hue bhi un ke tanhai to kya hoga

junun ke raste mein gar KHirad aai to kya hoga

nazar meri hi mere dil se Takrai to kya hoga

KHushi gham ki nazakat ko na ras aai to kya hoga

teri aaghosh mein bhi ruh ghabrai to kya hoga

mubarak hon tabassum ko tere ye karwaTen lekin

mere ashkon ne le li koi angDai to kya hoga

nigah-e-muztarib ko lakh Thahra len to kya hasil

tajalli KHud nazar ban kar jo tharrai to kya hoga

jhuka den hum to sar saqi tere gul-rang jamon par

baghawat ki jo koi mauj ubhar aai to kya hoga

musallam zauq-e-azadi bhi aadab-e-asiri bhi

qafas tak uD ke KHak-e-ashiyan aai to kya hoga

gulon ki dhaDkanen to jazb kar launga gulshan se

kisi ghunche ki lekin aankh bhar aai to kya hoga

ba-sai-e-ehtiyat-e-zauq-e-nazzara bhi mahfil mein

'shifa' meri nazar sab ko nazar aai to kya hoga