agar KHamosh hun to phir mera kirdar bolega

agar ḳhāmosh huuñ to phir mirā kirdār bolegā

yaqīnan aaj kā sach kal kā har aḳhbār bolegā

jinheñ hai shauq talve chāTne kā chaaT leñ be-shak

magar duniyā kī nazroñ meñ hunar har baar bolegā

jise tā'līm hāsil jhuuT ko sach mānñe kī ho

vahī to ḳhuun ko paanī guloñ ko ḳhaar bolegā

na āñkhoñ par yaqīñ jis kā na sachchā.ī se vāqif ho

fareb-e-'aql kā bīmār bas jaykār bolegā

jahāñ sach bolne par qatl kā farmān ho jaarī

zabāñ se aa.ina kab tak vahāñ inkār bolegā

sitam itne na Dhaao log saḌkoñ par utar aa.eñ

agar aisā huā to be-zabāñ yalġhār bolegā

mirā ḳhāmosh lahja hai mirī tahzīb kā haamī

'asīm' ash'ār meñ mere mirā me'yār bolegā

agar KHamosh hun to phir mera kirdar bolega

yaqinan aaj ka sach kal ka har aKHbar bolega

jinhen hai shauq talwe chaTne ka chaT len be-shak

magar duniya ki nazron mein hunar har bar bolega

jise ta'lim hasil jhuT ko sach manne ki ho

wahi to KHun ko pani gulon ko KHar bolega

na aankhon par yaqin jis ka na sachchai se waqif ho

fareb-e-'aql ka bimar bas jaykar bolega

jahan sach bolne par qatl ka farman ho jari

zaban se aaina kab tak wahan inkar bolega

sitam itne na Dhao log saDkon par utar aaen

agar aisa hua to be-zaban yalghaar bolega

mera KHamosh lahja hai meri tahzib ka hami

'asim' ash'ar mein mere mera me'yar bolega