agar main jaanta hai ishq mein dhaDka judai ka

agar maiñ jāntā hai ishq meñ dhaḌkā judā.ī kā

to jiite jī na letā naam hargiz āshnā.ī kā

jo āshiq saaf haiñ dil se unhīñ ko qatl karte haiñ

baḌā charchā hai māshūqoñ meñ āshiq-āzmā.ī kā

karūñ ik pal meñ barham kār-ḳhāne ko mohabbat ke

agar aalam meñ shohra duuñ tumhārī bevafā.ī kā

jafā yā mehr jo chāhe so kar le apne bandoñ par

mujhe ḳhatra nahīñ hargiz burā.ī yā bhalā.ī kā

na pahuñchā āh-o-nāla gosh tak us ke kabhū apnā

bayāñ ham kyā kareñ taal.e kī apne nā-rasā.ī kā

ḳhudāyā kis ke ham bande kahāveñ saḳht mushkil hai

rakhe hai har sanam is dahr meñ daavā ḳhudā.ī kā

ḳhudā kī bandagī kā 'soz' hai daavā to ḳhilqat ko

vale dekhā jise banda hai apnī ḳhud-numā.ī kā

agar main jaanta hai ishq mein dhaDka judai ka

to jite ji na leta nam hargiz aashnai ka

jo aashiq saf hain dil se unhin ko qatl karte hain

baDa charcha hai mashuqon mein aashiq-azmai ka

karun ek pal mein barham kar-KHane ko mohabbat ke

agar aalam mein shohra dun tumhaari bewafai ka

jafa ya mehr jo chahe so kar le apne bandon par

mujhe KHatra nahin hargiz burai ya bhalai ka

na pahuncha aah-o-nala gosh tak us ke kabhu apna

bayan hum kya karen tale ki apne na-rasai ka

KHudaya kis ke hum bande kahawen saKHt mushkil hai

rakhe hai har sanam is dahr mein dawa KHudai ka

KHuda ki bandagi ka 'soz' hai dawa to KHilqat ko

wale dekha jise banda hai apni KHud-numai ka