agar na zohra-jabinon ko be-wafa kahiye

agar na zohra-jabīnoñ ko be-vafā kahiye

to phir taġhāful-e-paiham pe un ko kyā kahiye

huzūr kyuuñ mirī har baat nā-ravā kahiye

burā huuñ maiñ to yaqīnan mujhe burā kahiye

hasīn yuuñ to zamāne meñ kaj-adā haiñ sabhī

magar savāl ye hai kis ko kaj-adā kahiye

ḳhamoshiyoñ pe jafāoñ kā jab ye aalam hai

to phir hasīnoñ se kis tarah mudda.ā kahiye

jo luT hī jaanā ba-har-hāl hai ma.āl-e-safar

to kyuuñ na rahzan-e-manzil ko rahnumā kahiye

yahī vafā kā hai dastūr bhī taqāzā bhī

ki har jafā ko sitamgār kī adā kahiye

butoñ ko shauq-e-ḳhudā.ī huā hai ai 'muslim'

janāb aap bhī patthar ko ab ḳhudā kahiye

agar na zohra-jabinon ko be-wafa kahiye

to phir taghaful-e-paiham pe un ko kya kahiye

huzur kyun meri har baat na-rawa kahiye

bura hun main to yaqinan mujhe bura kahiye

hasin yun to zamane mein kaj-ada hain sabhi

magar sawal ye hai kis ko kaj-ada kahiye

KHamoshiyon pe jafaon ka jab ye aalam hai

to phir hasinon se kis tarah muddaa kahiye

jo luT hi jaana ba-har-haal hai maal-e-safar

to kyun na rahzan-e-manzil ko rahnuma kahiye

yahi wafa ka hai dastur bhi taqaza bhi

ki har jafa ko sitamgar ki ada kahiye

buton ko shauq-e-KHudai hua hai ai 'muslim'

janab aap bhi patthar ko ab KHuda kahiye