agar sajdon mein soz-e-dil nahin hai

agar sajdoñ meñ soz-e-dil nahīñ hai

ibādat kā koī hāsil nahīñ hai

bhaTakne se bhī kuchh hāsil nahīñ hai

safar kī jab koī manzil nahīñ hai

zabān-e-hāl se kahtī haiñ lāsheñ

mohabbat kā koī qaa.il nahīñ hai

asar jis par na ho āh-o-fuġhāñ kā

vo sach-much pyaar ke qābil nahīñ hai

yaqīnan vo yahīñ hogā kahīñ par

mirā dil gum-shuda file nahīñ hai

mirī āñkheñ haiñ maazī kā havāla

mire ḳhvāboñ meñ mustaqbil nahīñ hai

hamāre daur meñ shāyad vafā bhī

nisāb-e-ishq meñ dāḳhil nahīñ hai

koī ifrīt guzrā hai idhar se

yahāñ lāsheñ to haiñ qātil nahīñ hai

garebāñ chaak hai yaañ har kisī kā

mah-e-kāmil bhī ab kāmil nahīñ hai

koī aayā nahīñ mujh ko bachāne

mujhe lagtā hai ye sāhil nahīñ hai

jise tardīd karne kī ho aadat

vo qaa.il ho ke bhī qaa.il nahīñ hai

kisī par to yaqīñ karnā paḌegā

yahāñ har shaḳhs to bātil nahīñ hai

'suhaib' is bevafā kā kyā kareñ ham

hamārā dil hamārā dil nahīñ hai

agar sajdon mein soz-e-dil nahin hai

ibaadat ka koi hasil nahin hai

bhaTakne se bhi kuchh hasil nahin hai

safar ki jab koi manzil nahin hai

zaban-e-haal se kahti hain lashen

mohabbat ka koi qail nahin hai

asar jis par na ho aah-o-fughan ka

wo sach-much pyar ke qabil nahin hai

yaqinan wo yahin hoga kahin par

mera dil gum-shuda file nahin hai

meri aankhen hain mazi ka hawala

mere KHwabon mein mustaqbil nahin hai

hamare daur mein shayad wafa bhi

nisab-e-ishq mein daKHil nahin hai

koi ifrit guzra hai idhar se

yahan lashen to hain qatil nahin hai

gareban chaak hai yan har kisi ka

mah-e-kaamil bhi ab kaamil nahin hai

koi aaya nahin mujh ko bachane

mujhe lagta hai ye sahil nahin hai

jise tardid karne ki ho aadat

wo qail ho ke bhi qail nahin hai

kisi par to yaqin karna paDega

yahan har shaKHs to baatil nahin hai

'suhaib' is bewafa ka kya karen hum

hamara dil hamara dil nahin hai