agar salamat raha tasawwur to bagh-e-dil pur-bahaar hoga

agar salāmat rahā tasavvur to bāġh-e-dil pur-bahār hogā

nafas meñ yād-e-habīb hogī nazar meñ dīdār-e-yār hogā

nazar nazar se mile to dam-bhar kahāñ sukūn-o-qarār hogā

na dil pe kuchh iḳhtiyār hogā na vaqt kā intizār hogā

riyāz-e-hastī meñ ishq hī se faroġh-e-husn-e-bahār hogā

nazar nazar tābdār hogī nafas nafas yādgār hogā

zamīr-e-insāñ ke aa.ine kī hai kyā haqīqat na pūchiyegā

nazar meñ hirs-o-havā milegī havas kā dil meñ ġhubār hogā

na ruk ġhamoñ se na Dar jafā se kaThin Dagar hai to ho balā se

agar tirā shauq hai salāmat har ik qadam kāmgār hogā

hasīn sāthī hasīn rahbar hasīn rāheñ hasīn manzil

bahar-qadam jannat-e-nazar hai safar bahut ḳhush-gavār hogā

tirī nazar kī navāzisheñ haiñ ki mast-o-be-ḳhud paḌe hue haiñ

kise ḳhabar thī ki aaj apnā bhī mai-kashoñ meñ shumār hogā

ġham-e-mohabbat jo dekhnā hai to mere ash.ār paḌh ke dekho

milegī tasvīr har suḳhan meñ ḳhayāl ā.īna-dār hogā

pilā.e jā sāqī-e-mohabbat vo aur hī haiñ vo maiñ nahīñ huuñ

jo muntazir hoñge fasl-e-gul ke jinheñ ḳhayāl-e-bahār hogā

jalā tū de sham-e-ārzū ko kiye tū jā bazm-e-dil ko raushan

agar mohabbat meñ hai sadāqat zarūr tū kāmgār hogā

jinheñ tamannā-e-dīd hogī unheñ ye muzhda sunā do 'faizī'

nazar se apnī naqāb ulaT do nasīb dīdār-e-yār hogā

agar salamat raha tasawwur to bagh-e-dil pur-bahaar hoga

nafas mein yaad-e-habib hogi nazar mein didar-e-yar hoga

nazar nazar se mile to dam-bhar kahan sukun-o-qarar hoga

na dil pe kuchh iKHtiyar hoga na waqt ka intizar hoga

riyaz-e-hasti mein ishq hi se farogh-e-husn-e-bahaar hoga

nazar nazar tabdar hogi nafas nafas yaadgar hoga

zamir-e-insan ke aaine ki hai kya haqiqat na puchiyega

nazar mein hirs-o-hawa milegi hawas ka dil mein ghubar hoga

na ruk ghamon se na Dar jafa se kaThin Dagar hai to ho bala se

agar tera shauq hai salamat har ek qadam kaamgar hoga

hasin sathi hasin rahbar hasin rahen hasin manzil

bahar-qadam jannat-e-nazar hai safar bahut KHush-gawar hoga

teri nazar ki nawazishen hain ki mast-o-be-KHud paDe hue hain

kise KHabar thi ki aaj apna bhi mai-kashon mein shumar hoga

gham-e-mohabbat jo dekhna hai to mere ashaar paDh ke dekho

milegi taswir har suKHan mein KHayal aaina-dar hoga

pilae ja saqi-e-mohabbat wo aur hi hain wo main nahin hun

jo muntazir honge fasl-e-gul ke jinhen KHayal-e-bahaar hoga

jala tu de sham-e-arzu ko kiye tu ja bazm-e-dil ko raushan

agar mohabbat mein hai sadaqat zarur tu kaamgar hoga

jinhen tamanna-e-did hogi unhen ye muzhda suna do 'faizi'

nazar se apni naqab ulaT do nasib didar-e-yar hoga