agar wo ham-safar Thahren to hum ko Dar mein rakhte hain

agar vo ham-safar Thahreñ to ham ko Dar meñ rakhte haiñ

bikhar jaa.eñ na ham ḳhud ko muqayyad ghar meñ rakhte haiñ

hameñ sayyārgāñ kī gardisheñ ma.alūm haiñ lekin

ham apnī gardishoñ ko apne hī mehvar meñ rakhte haiñ

safar ke ba.ad rahte haiñ tasalsul meñ safar ke ham

talāsh-e-rizq kā jazba shikasta par meñ rakhte haiñ

hamārā hāl-e-dil ab tak kisī par khul nahīñ paayā

vufūr-e-dard ko ham zabt kī chādar meñ rakhte haiñ

ham ahl-e-dard haiñ apnā to sheva hī faqīrī hai

jahāñ ke dard apnī zaat ke paikar meñ rakhte haiñ

koī qārūn baaqī hai na koī shaah ab 'āsif'

vo kaise log haiñ ḳhud ko jo qaid-e-zar meñ rakhte haiñ

agar wo ham-safar Thahren to hum ko Dar mein rakhte hain

bikhar jaen na hum KHud ko muqayyad ghar mein rakhte hain

hamein sayyargan ki gardishen malum hain lekin

hum apni gardishon ko apne hi mehwar mein rakhte hain

safar ke baad rahte hain tasalsul mein safar ke hum

talash-e-rizq ka jazba shikasta par mein rakhte hain

hamara haal-e-dil ab tak kisi par khul nahin paya

wufur-e-dard ko hum zabt ki chadar mein rakhte hain

hum ahl-e-dard hain apna to shewa hi faqiri hai

jahan ke dard apni zat ke paikar mein rakhte hain

koi qarun baqi hai na koi shah ab 'asif'

wo kaise log hain KHud ko jo qaid-e-zar mein rakhte hain