agar ye sach hai ujala dikhai deta hai

agar ye sach hai ujālā dikhā.ī detā hai

to kyoñ chaman meñ añdherā dikhā.ī detā hai

vo aa.ina ho ki gul ho ki hoñ mah-o-ḳhurshīd

sabhī meñ aap kā jalvā dikhā.ī detā hai

jise milī na ho saaqī kī mast āñkhoñ se

sharāb pī ke bhī pyāsā dikhā.ī detā hai

manāo jashn ki tārīkī-e-shab-e-ġham meñ

nigār-e-sub.h kā chehrā dikhā.ī detā hai

ilāhī ḳhair mire jazba-e-mohabbat kī

abhī se ḳhvāb meñ sahrā dikhā.ī detā hai

vo gul jo bā’is-e-sad-zīnat-e-gulistāñ haiñ

unhīñ pe ḳhāroñ kā pahrā dikhā.ī detā hai

vo nā-murād-e-azal jis ko ishq kahte haiñ

havas ke shahr meñ tanhā dikhā.ī detā hai

ḳhirad jo dekhe to har samt ik añdherā hai

junūñ ko chāñd sunahrā dikhā.ī detā hai

ham aa.ina bhī jo dekheñ to 'yād' kyā hāsil

hameñ to un kā hī chehrā dikhā.ī detā hai

agar ye sach hai ujala dikhai deta hai

to kyon chaman mein andhera dikhai deta hai

wo aaina ho ki gul ho ki hon mah-o-KHurshid

sabhi mein aap ka jalwa dikhai deta hai

jise mili na ho saqi ki mast aankhon se

sharab pi ke bhi pyasa dikhai deta hai

manao jashn ki tariki-e-shab-e-gham mein

nigar-e-subh ka chehra dikhai deta hai

ilahi KHair mere jazba-e-mohabbat ki

abhi se KHwab mein sahra dikhai deta hai

wo gul jo ba’is-e-sad-zinat-e-gulistan hain

unhin pe KHaron ka pahra dikhai deta hai

wo na-murad-e-azal jis ko ishq kahte hain

hawas ke shahr mein tanha dikhai deta hai

KHirad jo dekhe to har samt ek andhera hai

junun ko chand sunahra dikhai deta hai

hum aaina bhi jo dekhen to 'yaad' kya hasil

hamein to un ka hi chehra dikhai deta hai