agarche husn kabhi hum pe teri zat khule

agarche husn kabhī ham pe terī zaat khule

hamāre sāmne asrār-e-kā.enāt khule

yaqīnan ek din us par guzar ke dekheñge

kabhī jo arz-e-tamanna kā pul-sirāt khule

na jaane kitne hī dil muntazir khaḌe haiñ yahāñ

laboñ pe us ke dabī hai abhī jo baat khule

ka.ī baras se muqaffal thiiñ ḳhvāhisheñ dil meñ

muḳhātab aap ke ye bāb-e-ḳhvāhishāt khule

koī to puḳhta vasīla ho mere chārāgar

girah diloñ kī khule to na be-sabāt khule

maiñ chāhtā thā ki vo dauḌ kar lipaT jaa.e

kabhī dikhe hī nahīñ us ko mere haath khule

tumhāre husn kī harkat koī na zaa.e' ho

tumhārī zulf mirī chashm saath saath khule

ġhamoñ kī qaid meñ 'āzād' phañs gayā huuñ maiñ

kabhī to kaash koī sūrat-e-najāt khule

agarche husn kabhi hum pe teri zat khule

hamare samne asrar-e-kaenat khule

yaqinan ek din us par guzar ke dekhenge

kabhi jo arz-e-tamanna ka pul-siraat khule

na jaane kitne hi dil muntazir khaDe hain yahan

labon pe us ke dabi hai abhi jo baat khule

kai baras se muqaffal thin KHwahishen dil mein

muKHatab aap ke ye bab-e-KHwahishat khule

koi to puKHta wasila ho mere chaaragar

girah dilon ki khule to na be-sabaat khule

main chahta tha ki wo dauD kar lipaT jae

kabhi dikhe hi nahin us ko mere hath khule

tumhaare husn ki harkat koi na zae' ho

tumhaari zulf meri chashm sath sath khule

ghamon ki qaid mein 'azad' phans gaya hun main

kabhi to kash koi surat-e-najat khule