agarche main KHat-e-jada pe ek gard-e-safar hun

agarche maiñ ḳhat-e-jāda pe ik gard-e-safar huuñ

khaTaktā huuñ magar phir bhī ki manzil kī ḳhabar huuñ

ye mauj-e-ḳhūñ hai sairābī-e-dil kā ik ishāra

so ik ḳhāk-e-numū-rafta pe hī mahv-e-safar huuñ

ye umr-e-ḳhāk-paimā ik tamannā se bhī kam hai

so kitnī ḳhvāhishoñ se maiñ abhī tak be-ḳhabar huuñ

khule haiñ rañg-e-imkānāt ā.inda ke mujh par

nirālī merī ḳhushbū hai maiñ miTTī kā shajar huuñ

jamāl-e-sā.at-e-sad-rañg ko maiñ sher kar duuñ

maiñ kab se is junūñ-añgez ke zer-e-asar huuñ

tah-e-satar-e-tamannā dekh luuñ dil kā taḌapnā

ziyāda to nahīñ itnā to maiñ sāhib-e-nazar huuñ

agarche main KHat-e-jada pe ek gard-e-safar hun

khaTakta hun magar phir bhi ki manzil ki KHabar hun

ye mauj-e-KHun hai sairabi-e-dil ka ek ishaara

so ek KHak-e-numu-rafta pe hi mahw-e-safar hun

ye umr-e-KHak-paima ek tamanna se bhi kam hai

so kitni KHwahishon se main abhi tak be-KHabar hun

khule hain rang-e-imkanat aainda ke mujh par

nirali meri KHushbu hai main miTTi ka shajar hun

jamal-e-saat-e-sad-rang ko main sher kar dun

main kab se is junun-angez ke zer-e-asar hun

tah-e-satar-e-tamanna dekh lun dil ka taDapna

ziyaada to nahin itna to main sahib-e-nazar hun