agarche maut ko humne gale lagaya nahin

agarche maut ko ham ne gale lagāyā nahīñ

magar hayāt kā ehsān bhī uThāyā nahīñ

nazar ke sāmne ik pal bhī jo nahīñ Thahrā

vo kaun shaḳhs hai dil ne use bhulāyā nahīñ

maiñ apne aap ko kin rāstoñ meñ bhuul aayā

ki zindagī ne bhī merā surāġh paayā nahīñ

maiñ jis ke vāste malbūs-e-harf buntā huuñ

vo ik ḳhayāl abhī zehn meñ bhī aayā nahīñ

hazār ḳhvāhish-e-duniyā hazār ḳhauf-e-ziyāñ

mirī anā kā qadam phir bhī Dagmagāyā nahīñ

hayāt-e-jabr kā sahrā-e-be-karāñ jis meñ

mohabbatoñ ke shajar kā kahīñ bhī saayā nahīñ

zamāna guzrā 'munavvar' udhar se guzrā thā

havā ne naqsh-e-qadam aaj tak miTāyā nahīñ

agarche maut ko hum ne gale lagaya nahin

magar hayat ka ehsan bhi uThaya nahin

nazar ke samne ek pal bhi jo nahin Thahra

wo kaun shaKHs hai dil ne use bhulaya nahin

main apne aap ko kin raston mein bhul aaya

ki zindagi ne bhi mera suragh paya nahin

main jis ke waste malbus-e-harf bunta hun

wo ek KHayal abhi zehn mein bhi aaya nahin

hazar KHwahish-e-duniya hazar KHauf-e-ziyan

meri ana ka qadam phir bhi Dagmagaya nahin

hayat-e-jabr ka sahra-e-be-karan jis mein

mohabbaton ke shajar ka kahin bhi saya nahin

zamana guzra 'munawwar' udhar se guzra tha

hawa ne naqsh-e-qadam aaj tak miTaya nahin