ahd-e-nau tariKH-e-la-mahdud ki baaten karen

ahd-e-nau tārīḳh-e-lā-mahdūd kī bāteñ kareñ

aao baiTheñ lamha-e-maujūd kī bāteñ kareñ

DhūñD kar laa.eñ kahīñ se ham bhī andāz-e-ayāz

qasr-e-sultāñ meñ dil-e-mahmūd kī bāteñ kareñ

aag ThanDī kis tarah ho kis tarah aa.e bahār

gulshan-e-hastī meñ ham bahbūd kī bāteñ kareñ

ātish-e-namrūd sehn-e-gul banā thā aur ham

sehn-e-gul meñ ātish-e-namrūd kī bāteñ kareñ

nafratoñ kī aag shahr-e-dil ko ḳhākistar kare

is se pahle sā.at-e-mas.ūd kī bāteñ kareñ

kaise manzil par pahuñch sakte haiñ bhaTke qāfile

rāhzan jab manzil-e-maqsūd kī bāteñ kareñ

bārgāh-e-rab meñ ho maqbūl har harf-e-duā

sidq-e-dil se ham agar ma.abūd kī bāteñ kareñ

vajd meñ aa.eñ parinde ab bhī aahan mom ho

ham bhī gar āvāz meñ dā.ūd kī bāteñ kareñ

sajda-rezī meñ vahī aa.e maza 'siddīq' phir

jab samīm-e-qalb se masjūd kī bāteñ kareñ

ahd-e-nau tariKH-e-la-mahdud ki baaten karen

aao baiThen lamha-e-maujud ki baaten karen

DhunD kar laen kahin se hum bhi andaz-e-ayaz

qasr-e-sultan mein dil-e-mahmud ki baaten karen

aag ThanDi kis tarah ho kis tarah aae bahaar

gulshan-e-hasti mein hum bahbud ki baaten karen

aatish-e-namrud sehn-e-gul bana tha aur hum

sehn-e-gul mein aatish-e-namrud ki baaten karen

nafraton ki aag shahr-e-dil ko KHakistar kare

is se pahle saat-e-masud ki baaten karen

kaise manzil par pahunch sakte hain bhaTke qafile

rahzan jab manzil-e-maqsud ki baaten karen

bargah-e-rab mein ho maqbul har harf-e-dua

sidq-e-dil se hum agar mabud ki baaten karen

wajd mein aaen parinde ab bhi aahan mom ho

hum bhi gar aawaz mein daud ki baaten karen

sajda-rezi mein wahi aae maza 'siddiq' phir

jab samim-e-qalb se masjud ki baaten karen