ahd-e-piri mein hue apne jo sab baal safed

ahd-e-pīrī meñ hue apne jo sab baal safed

ham ye samjhe ki huā nāma-e-a.amāl safed

zīnat us chehra-e-gul-gūñ kī huā ḳhāl-e-siyāh

dāḳhil-e-aib hai gar jism pe ho ḳhaal safed

aa.e kis dhaj se gul-andām mire mātam meñ

tan pe poshāk siyah haath meñ rūmāl safed

shaam se sub.h hamesha huī ai gesū-e-yār

hogā ik roz yahī dām-e-siyah jaal safed

ḳhuuñ bahāte hue kuchh rahm nahīñ aatā hai

jism meñ apne lahū rakhte haiñ qattāl safed

mah-o-ḳhurshīd ne ik din use dekhā thā kahīñ

ek kā zard to hai ek kā ahvāl safed

mudda.ā ye hai mire milne se hai saaf javāb

us ne saada mujhe kāġhaz kiyā irsāl safed

ātish-e-ġham ne ye ai 'sabr' mujhe phūñkā hai

raakh meñ apnī huā ho ke maiñ pāmāl safed

ahd-e-piri mein hue apne jo sab baal safed

hum ye samjhe ki hua nama-e-amal safed

zinat us chehra-e-gul-gun ki hua KHal-e-siyah

daKHil-e-aib hai gar jism pe ho KHal safed

aae kis dhaj se gul-andam mere matam mein

tan pe poshak siyah hath mein rumal safed

sham se subh hamesha hui ai gesu-e-yar

hoga ek roz yahi dam-e-siyah jal safed

KHun bahate hue kuchh rahm nahin aata hai

jism mein apne lahu rakhte hain qattal safed

mah-o-KHurshid ne ek din use dekha tha kahin

ek ka zard to hai ek ka ahwal safed

muddaa ye hai mere milne se hai saf jawab

us ne sada mujhe kaghaz kiya irsal safed

aatish-e-gham ne ye ai 'sabr' mujhe phunka hai

rakh mein apni hua ho ke main pamal safed