ahd-e-rafta ke ujalon ki sada hain hum bhi

ahd-e-rafta ke ujāloñ kī sadā haiñ ham bhī

qartaba terī tarah radd-e-fanā haiñ ham bhī

bād-e-yaḳh-basta chalī hai to chale ḳhuub chale

jalte tapte hue sahrā kī sadā haiñ ham bhī

umr-o-ayyār kī zambīl meñ rakkhā kyā hai

haq kī talvār haiñ hamza kī sadā haiñ ham bhī

sehr kyā chiiz hai bātil kī haqīqat kiyā hai

vaqt ke haath meñ muusā kā asā haiñ ham bhī

kāsa-e-shab meñ ujālā mah-e-naḳhshab kā hai

aur chaḌhte hue sūraj kī ziyā haiñ ham bhī

ahd-e-nau apnī zabānoñ pe sajā le ham ko

apne aslāf kī pākīza duā haiñ ham bhī

'shams' kyā ḳhauf añdheroñ se bhalā ho ham ko

raat vāloñ ke liye sub.h-numā haiñ ham bhī

ahd-e-rafta ke ujalon ki sada hain hum bhi

qartaba teri tarah radd-e-fana hain hum bhi

baad-e-yaKH-basta chali hai to chale KHub chale

jalte tapte hue sahra ki sada hain hum bhi

umr-o-ayyar ki zambil mein rakkha kya hai

haq ki talwar hain hamza ki sada hain hum bhi

sehr kya chiz hai baatil ki haqiqat kiya hai

waqt ke hath mein musa ka asa hain hum bhi

kasa-e-shab mein ujala mah-e-naKHshab ka hai

aur chaDhte hue suraj ki ziya hain hum bhi

ahd-e-nau apni zabanon pe saja le hum ko

apne aslaf ki pakiza dua hain hum bhi

'shams' kya KHauf andheron se bhala ho hum ko

raat walon ke liye subh-numa hain hum bhi