ahd-e-rafta ki lakiron pe na chalte rahiye

ahd-e-rafta kī lakīroñ pe na chalte rahiye

vaqt ke saath ḳhayālāt badalte rahiye

Thokareñ khā ke bahar-gām sañbhalte rahiye

manzil-e-shauq bhī mil jā.egī chalte rahiye

ġhuncha-o-gul ko ba-sad-shauq masalte rahiye

ehtiyātan kabhī kāñToñ pe bhī chalte rahiye

dost ban ban ke yūñhī zahr ugalte rahiye

āstīnoñ meñ mirī shauq se palte rahiye

qahqahe ban ke mire lab pe na Thahre na sahī

ashk ban kar mirī palkoñ pe machalte rahiye

shabnam o barf kī ThanDak hai na phūloñ kī mahak

ishq ik aag hai is aag meñ jalte rahiye

aap yūñhī nikhat-o-nūr ke chashme ban kar

ġham kī tārīk chaTānoñ se ubalte rahiye

mere gītoñ kā madhur saaz na baniye lekin

soz ban kar mire naġhmāt meñ Dhalte rahiye

'ehtishām' aap ko jiine kī tamanna hai agar

zindagī ke na.e unvān badalte rahiye

ahd-e-rafta ki lakiron pe na chalte rahiye

waqt ke sath KHayalat badalte rahiye

Thokaren kha ke bahar-gam sanbhalte rahiye

manzil-e-shauq bhi mil jaegi chalte rahiye

ghuncha-o-gul ko ba-sad-shauq masalte rahiye

ehtiyatan kabhi kanTon pe bhi chalte rahiye

dost ban ban ke yunhi zahr ugalte rahiye

aastinon mein meri shauq se palte rahiye

qahqahe ban ke mere lab pe na Thahre na sahi

ashk ban kar meri palkon pe machalte rahiye

shabnam o barf ki ThanDak hai na phulon ki mahak

ishq ek aag hai is aag mein jalte rahiye

aap yunhi nikhat-o-nur ke chashme ban kar

gham ki tarik chaTanon se ubalte rahiye

mere giton ka madhur saz na baniye lekin

soz ban kar mere naghmat mein Dhalte rahiye

'ehtisham' aap ko jine ki tamanna hai agar

zindagi ke nae unwan badalte rahiye