ahd-e-wafa subuk-hawa rang-e-wafa ke sath sath

ahd-e-vafā subuk-havā rañg-e-vafā ke saath saath

rūh-e-suḳhan badal ga.ī tarz-e-adā ke saath saath

sar meñ liye tirī havā āzim-e-shahr-e-dil chalā

nik.hat-e-gul ke ham-rikāb mauj-e-sabā ke saath saath

Dhañg badalte jā.eñge rañg machalte ā.eñge

laġhzish-e-pā kī tarz meñ rañg-e-hinā ke saath saath

ek tire ḳhayāl ne fikr ko par lagā diye

ham bhī havāoñ meñ rahe mauj-e-havā ke saath saath

tā ye safar hayāt kā maqsad-e-zindagī bane

chāhiye markaz-e-nigāh gardish-e-pā ke saath saath

lazzat-e-nā-umīdī-e-shauq bhī mustaqil to ho

tark-e-talab bhī kījiye tark-e-duā ke saath saath

aap hī kah ke sunte haiñ aap hī sun ke hañste haiñ

apnī hī bāzgasht haiñ apnī sadā ke saath saath

haq bhī hai maslahat-e-talab ruḳh pe havā-e-dahr ke

chalte haiñ ab ḳhudā-parast ḳhalq-e-ḳhudā ke saath saath

'bāqar'-e-kam-ayār kī qadr kahāñ thī ziist meñ

uTh ke ḳhamosh chal diyā vo bhī qazā ke saath saath

ahd-e-wafa subuk-hawa rang-e-wafa ke sath sath

ruh-e-suKHan badal gai tarz-e-ada ke sath sath

sar mein liye teri hawa aazim-e-shahr-e-dil chala

nikhat-e-gul ke ham-rikab mauj-e-saba ke sath sath

Dhang badalte jaenge rang machalte aaenge

laghzish-e-pa ki tarz mein rang-e-hina ke sath sath

ek tere KHayal ne fikr ko par laga diye

hum bhi hawaon mein rahe mauj-e-hawa ke sath sath

ta ye safar hayat ka maqsad-e-zindagi bane

chahiye markaz-e-nigah gardish-e-pa ke sath sath

lazzat-e-na-umidi-e-shauq bhi mustaqil to ho

tark-e-talab bhi kijiye tark-e-dua ke sath sath

aap hi kah ke sunte hain aap hi sun ke hanste hain

apni hi bazgasht hain apni sada ke sath sath

haq bhi hai maslahat-e-talab ruKH pe hawa-e-dahr ke

chalte hain ab KHuda-parast KHalq-e-KHuda ke sath sath

'baqar'-e-kam-ayar ki qadr kahan thi zist mein

uTh ke KHamosh chal diya wo bhi qaza ke sath sath