ahl-e-din ki rawish-e-tang se be-zar hun main

ahl-e-dīñ kī ravish-e-tang se be-zār huuñ maiñ

ye gunah hai to sazā do ki gunahgār huuñ maiñ

ruk nahīñ paatī zabāñ merī misāl-e-suqrāt

kāsa-e-zahr kā duniyā se talabgār huuñ maiñ

irtiqā meñ mire kitne hī dimāġh aa.e kaam

jis kī buniyād saroñ par hai vo mīnār huuñ maiñ

jis se hote haiñ yatīmoñ ke ḳhazāne mahfūz

aaj ik aisī hī girtī huī dīvār huuñ maiñ

sirf rindī hī ko duniyā meñ nahīñ merī talāsh

pārsā.ī ko bhī is bazm meñ darkār huuñ maiñ

jis ke phūloñ ke nasīboñ meñ haiñ gulchīñ ke sitam

dosto sahn meñ aalam ke vo gulzār huuñ maiñ

faash kartā huuñ zamāne meñ riyā ke parde

aur ye bhī hai haqīqat ki riyā-kār huuñ maiñ

zohd par naaz kiyā kartā thā kal tak lekin

aaj ik rind-e-ḳharābāt qadah-ḳhvār huuñ meñ

ahl-e-din ki rawish-e-tang se be-zar hun main

ye gunah hai to saza do ki gunahgar hun main

ruk nahin pati zaban meri misal-e-suqraat

kasa-e-zahr ka duniya se talabgar hun main

irtiqa mein mere kitne hi dimagh aae kaam

jis ki buniyaad saron par hai wo minar hun main

jis se hote hain yatimon ke KHazane mahfuz

aaj ek aisi hi girti hui diwar hun main

sirf rindi hi ko duniya mein nahin meri talash

parsai ko bhi is bazm mein darkar hun main

jis ke phulon ke nasibon mein hain gulchin ke sitam

dosto sahn mein aalam ke wo gulzar hun main

fash karta hun zamane mein riya ke parde

aur ye bhi hai haqiqat ki riya-kar hun main

zohd par naz kiya karta tha kal tak lekin

aaj ek rind-e-KHarabaat qadah-KHwar hun mein