ahl-e-dil jis ko fana aur na baqa kahte hain

ahl-e-dil jis ko fanā aur na baqā kahte haiñ

zinda rahne ke is andāz ko kyā kahte haiñ

zikr us shoḳh se kartā hai koī jab merā

ruḳh pe aa jaatā hai ik rang-e-hayā kahte haiñ

ḳhaak us shaḳhs ne mujh hī ko kiyā sab jis ko

sho.ala-rū shola-nazar sho.ala-navā kahte haiñ

lamha bhar ishq pe apne zarā khul kar hañs leñ

girya-e-hijr hai qismat meñ likhā kahte haiñ

vahī suntā nahīñ fariyād hamārī ai dil

ham jise apnī mohabbat kā ḳhudā kahte haiñ

na rah-o-rasm hai jis se na duā aur na salām

phir bhī ahbāb mujhe us pe fidā kahte haiñ

be-takalluf jo samā jaa.e nigāh-o-dil meñ

ham faqat us ko mohabbat kī adā kahte haiñ

kitne be-dīn haiñ mat pūchh avām-e-mahkūm

har na.e daur ke hākim ko ḳhudā kahte haiñ

ḳhaas apnoñ meñ bhī hote haiñ kuchh aise bad-ḳhvāh

dil se chāheñ jo burā muñh pe bhalā kahte haiñ

dil kī āvāz hai ab ruuh kā nauha ai 'rāz'

jaane kyoñ log mujhe naġhma-sarā kahte haiñ

ahl-e-dil jis ko fana aur na baqa kahte hain

zinda rahne ke is andaz ko kya kahte hain

zikr us shoKH se karta hai koi jab mera

ruKH pe aa jata hai ek rang-e-haya kahte hain

KHak us shaKHs ne mujh hi ko kiya sab jis ko

shoala-ru shola-nazar shoala-nawa kahte hain

lamha bhar ishq pe apne zara khul kar hans len

girya-e-hijr hai qismat mein likha kahte hain

wahi sunta nahin fariyaad hamari ai dil

hum jise apni mohabbat ka KHuda kahte hain

na rah-o-rasm hai jis se na dua aur na salam

phir bhi ahbab mujhe us pe fida kahte hain

be-takalluf jo sama jae nigah-o-dil mein

hum faqat us ko mohabbat ki ada kahte hain

kitne be-din hain mat puchh awam-e-mahkum

har nae daur ke hakim ko KHuda kahte hain

KHas apnon mein bhi hote hain kuchh aise bad-KHwah

dil se chahen jo bura munh pe bhala kahte hain

dil ki aawaz hai ab ruh ka nauha ai 'raaz'

jaane kyon log mujhe naghma-sara kahte hain