ahl-e-duniya dekhte hain kitni hairani ke sath

ahl-e-duniyā dekhte haiñ kitnī hairānī ke saath

zindagī ham ne basar kar lī hai nādānī ke saath

ik tamannāoñ kā bahr-e-be-karāñ thā aur ham

kashti-e-jāñ ko bachā laa.e haiñ āsānī ke saath

ab kise dil ke dhaḌakne kī sadā.eñ yaad haiñ

ye bhī hañgāma gayā is ghar kī vīrānī ke saath

ai havā tū ne to saare mārke sar kar liye

sub.h-e-fardā paas baiThī hai pashīmānī ke saath

dasht-e-vahshat se bhalā kartā hai āñkheñ chaar kaun

shahr baḌhte jā rahe haiñ apnī uryānī ke saath

tū nahīñ aatā na aa ai dost ab terī tarah

ham bhī chal nikle haiñ apne dushman-e-jānī ke saath

ahl-e-duniya dekhte hain kitni hairani ke sath

zindagi hum ne basar kar li hai nadani ke sath

ek tamannaon ka bahr-e-be-karan tha aur hum

kashti-e-jaan ko bacha lae hain aasani ke sath

ab kise dil ke dhaDakne ki sadaen yaad hain

ye bhi hangama gaya is ghar ki virani ke sath

ai hawa tu ne to sare marke sar kar liye

subh-e-farda pas baiThi hai pashimani ke sath

dasht-e-wahshat se bhala karta hai aankhen chaar kaun

shahr baDhte ja rahe hain apni uryani ke sath

tu nahin aata na aa ai dost ab teri tarah

hum bhi chal nikle hain apne dushman-e-jaani ke sath