ahl-e-duniya naya naya hun main

ahl-e-duniyā nayā nayā huuñ maiñ

ma.azarat ḳhvāb dekhtā huuñ maiñ

hai parindoñ se ḳhāmushī darkār

peḌ se baat kar rahā huuñ maiñ

us kī tasvīr hai ghaḌī ke paas

har ghaḌī vaqt dekhtā huuñ maiñ

ḳhud se kartā huuñ mashvara lekin

baat auroñ kī māntā huuñ maiñ

is qadar tīrgī kā qaa.il huuñ

dhuup ko dhuup kah rahā huuñ maiñ

vāqi.a huuñ azal se pahle kā

kun se pahle uThī sadā huuñ maiñ

mujh ko chup-zāt samjhā jaatā hai

is qadar tez chīḳhtā huuñ maiñ

ahl-e-duniya naya naya hun main

mazarat KHwab dekhta hun main

hai parindon se KHamushi darkar

peD se baat kar raha hun main

us ki taswir hai ghaDi ke pas

har ghaDi waqt dekhta hun main

KHud se karta hun mashwara lekin

baat auron ki manta hun main

is qadar tirgi ka qail hun

dhup ko dhup kah raha hun main

waqia hun azal se pahle ka

kun se pahle uThi sada hun main

mujh ko chup-zat samjha jata hai

is qadar tez chiKHta hun main