ahl-e-gham aao zara sair-e-gulistan kar len

ahl-e-ġham aao zarā sair-e-gulistāñ kar leñ

gar ḳhizāñ hai to chalo shaġhl-e-bahārāñ kar leñ

phir to har samt añdherā hī añdherā hogā

pau phaTī hai to luTī bazm charāġhāñ kar leñ

dil kī vīrāniyāñ āñkhoñ meñ uḌātī haiñ ġhubār

mil ke ro leñ to kuchh un ko bhī farozāñ kar leñ

qahqahoñ se to ghuTan aur bhī baḌh jā.egī

aao chup rah ke hī is dard kā darmāñ kar leñ

shāyad is tarah bagūloñ kā guzar mumkin ho

apne vīrāne ko kuchh aur bhī vīrāñ kar leñ

ham jo zinda haiñ to sab kahte haiñ kyuuñ zinda haiñ

aao mar kar bhī masīhāoñ ko hairāñ kar leñ

ahl-e-gham aao zara sair-e-gulistan kar len

gar KHizan hai to chalo shaghl-e-bahaaran kar len

phir to har samt andhera hi andhera hoga

pau phaTi hai to luTi bazm charaghan kar len

dil ki viraniyan aankhon mein uDati hain ghubar

mil ke ro len to kuchh un ko bhi farozan kar len

qahqahon se to ghuTan aur bhi baDh jaegi

aao chup rah ke hi is dard ka darman kar len

shayad is tarah bagulon ka guzar mumkin ho

apne virane ko kuchh aur bhi viran kar len

hum jo zinda hain to sab kahte hain kyun zinda hain

aao mar kar bhi masihaon ko hairan kar len