ahl-e-haq ke jo taraf-dar nahin ban sakte

ahl-e-haq ke jo taraf-dār nahīñ ban sakte

vo kisī aur ke ġham-ḳhvār nahīñ ban sakte

yuuñ to sab kuchh hai tirī god meñ tahzīb-e-jadīd

mere bachche mirā me'yār nahīñ ban sakte

ham to har ghar meñ haiñ ik pyaar ke bādal kī tarah

ham kisī sehn kī dīvār nahīñ ban sakte

ḳhuun se roz bujhāte haiñ jo nafrat ke charāġh

ai vatan vo tire ġhaddār nahīñ ban sakte

apne ajdād kī 'azmat jo bhulā dete haiñ

vo kabhī sāhib-e-kirdār nahīñ ban sakte

laakh majbūr kare vaqt magar ahl-e-zamīr

kisī zālim ke taraf-dār nahīñ ban sakte

kam na ho talḳhī-e-guftār agar donoñ taraf

sulh ke rāste hamvār nahīñ ban sakte

mere ḳhāke mire afkār churāne vaale

merī 'azmat mirā me'yār nahīñ ban sakte

ham ta'assub kī salīboñ pe bhī sach boleñge

aap kī tarh adākār nahīñ ban sakte

taaj par ḳhatm huī pyaar kī 'azmat 'razmī'

maqbare ab kabhī shahkār nahīñ ban sakte

ahl-e-haq ke jo taraf-dar nahin ban sakte

wo kisi aur ke gham-KHwar nahin ban sakte

yun to sab kuchh hai teri god mein tahzib-e-jadid

mere bachche mera me'yar nahin ban sakte

hum to har ghar mein hain ek pyar ke baadal ki tarah

hum kisi sehn ki diwar nahin ban sakte

KHun se roz bujhate hain jo nafrat ke charagh

ai watan wo tere ghaddar nahin ban sakte

apne ajdad ki 'azmat jo bhula dete hain

wo kabhi sahib-e-kirdar nahin ban sakte

lakh majbur kare waqt magar ahl-e-zamir

kisi zalim ke taraf-dar nahin ban sakte

kam na ho talKHi-e-guftar agar donon taraf

sulh ke raste hamwar nahin ban sakte

mere KHake mere afkar churane wale

meri 'azmat mera me'yar nahin ban sakte

hum ta'assub ki salibon pe bhi sach bolenge

aap ki tarh adakar nahin ban sakte

taj par KHatm hui pyar ki 'azmat 'razmi'

maqbare ab kabhi shahkar nahin ban sakte