ahl-e-nazar ki aankh mein husn ki aabru nahin

ahl-e-nazar kī aañkh meñ husn kī aabrū nahīñ

yaanī ye gul hai kāġhzī rañg hai jis meñ bū nahīñ

dil ko na ranj dījiye shauq se zab.h kījiye

aap kī teġh teġh hai merā gulū gulū nahīñ

dushman o dost ke liye chāhiye shukr-e-teġh-e-nāz

kaun hai qatl-gāh meñ aaj jo surḳh-rū nahīñ

aap se dil lagā.ūñ kyuuñ jaur-o-sitam uThā.ūñ kyuuñ

ab to sukūñ se kaam hai dard kī justujū nahīñ

bazm-e-suḳhan meñ ai 'rashīd' naġhme se mujh ko kaam kyā

shā.ir-e-shoḳh-fikr huuñ mutrib-e-ḳhush-gulū nahīñ

ahl-e-nazar ki aankh mein husn ki aabru nahin

yani ye gul hai kaghzi rang hai jis mein bu nahin

dil ko na ranj dijiye shauq se zabh kijiye

aap ki tegh tegh hai mera gulu gulu nahin

dushman o dost ke liye chahiye shukr-e-tegh-e-naz

kaun hai qatl-gah mein aaj jo surKH-ru nahin

aap se dil lagaun kyun jaur-o-sitam uThaun kyun

ab to sukun se kaam hai dard ki justuju nahin

bazm-e-suKHan mein ai 'rashid' naghme se mujh ko kaam kya

shair-e-shoKH-fikr hun mutrib-e-KHush-gulu nahin