ahl-e-wafa ki jaan the dushwar raste

ahl-e-vafā kī jaan the dushvār rāste

phūloñ kā farsh ban ga.e pur-ḳhār rāste

terī shamīm-e-zulf ke sadqe ki aaj bhī

mahkī huī fazā hai to gul-bār rāste

vīrāniyoñ kā raaj thā sunsān thī fazā

aate hī kis ke ho ga.e bedār rāste

sach hai ki har qadam pe nasheb-o-farāz haiñ

hote nahīñ haiñ ziist ke hamvār rāste

science ke irtiqā kā karishma yahī to hai

amn-o-amāñ ke ho ga.e dushvār rāste

teġh-e-bashar se ḳhūn-e-bashar jin pe hai ravāñ

haTte nahīñ nazar se vo gul-kār rāste

chalte raheñge shauq-e-shahādat meñ sarfarosh

dār-o-rasan ke laakh hoñ dushvār rāste

zauq-e-safar ke saath rahe shauq-e-justujū

hote nahīñ kisī ke bhī ġham-ḳhvār rāste

'maġhmūm’ shauq-e-manzil-e-maqsūd to bajā

manzil kī raah meñ na hoñ dīvār rāste

ahl-e-wafa ki jaan the dushwar raste

phulon ka farsh ban gae pur-KHar raste

teri shamim-e-zulf ke sadqe ki aaj bhi

mahki hui faza hai to gul-bar raste

viraniyon ka raj tha sunsan thi faza

aate hi kis ke ho gae bedar raste

sach hai ki har qadam pe nasheb-o-faraaz hain

hote nahin hain zist ke hamwar raste

science ke irtiqa ka karishma yahi to hai

amn-o-aman ke ho gae dushwar raste

tegh-e-bashar se KHun-e-bashar jin pe hai rawan

haTte nahin nazar se wo gul-kar raste

chalte rahenge shauq-e-shahadat mein sarfarosh

dar-o-rasan ke lakh hon dushwar raste

zauq-e-safar ke sath rahe shauq-e-justuju

hote nahin kisi ke bhi gham-KHwar raste

'maghmum’ shauq-e-manzil-e-maqsud to baja

manzil ki rah mein na hon diwar raste