ai ahl-e-nazar soz hamin saz hamin hain

ai ahl-e-nazar soz hamīñ saaz hamīñ haiñ

aalam meñ pas-e-parda-e-parvāz hamīñ haiñ

ai jabr-e-mashiyat ba-hama be-par-o-bālī

ab bhī hai jinheñ himmat-e-parvāz hamīñ haiñ

ḳhush haiñ ki nahīñ us sitam-ārā kā sitam aam

nāzāñ haiñ ki us ke hadaf-e-nāz hamīñ haiñ

vo anjuman-e-nāz-e-butāñ ho ki sar-e-dār

jis samt se guzre haiñ sar-afrāz hamīñ haiñ

dekheñ jo kisī aur taraf bhī vo sar-e-bazm

maqsūd-e-nigāh-e-ġhalat-andāz hamīñ haiñ

ai shāhid-e-ma.anī saf-e-shīrīñ-suḳhanāñ meñ

hai koī agar shā.ir-e-tannāz hamīñ haiñ

ai jān-e-'zafar' 'hāfiz'-o-'sādī' kī qafā meñ

ab vāris-e-mai-ḳhāna-e-shīrāz hamīñ haiñ

ai ahl-e-nazar soz hamin saz hamin hain

aalam mein pas-e-parda-e-parwaz hamin hain

ai jabr-e-mashiyat ba-hama be-par-o-baali

ab bhi hai jinhen himmat-e-parwaz hamin hain

KHush hain ki nahin us sitam-ara ka sitam aam

nazan hain ki us ke hadaf-e-naz hamin hain

wo anjuman-e-naz-e-butan ho ki sar-e-dar

jis samt se guzre hain sar-afraaz hamin hain

dekhen jo kisi aur taraf bhi wo sar-e-bazm

maqsud-e-nigah-e-ghalat-andaz hamin hain

ai shahid-e-mani saf-e-shirin-suKHanan mein

hai koi agar shair-e-tannaz hamin hain

ai jaan-e-'zafar' 'hafiz'-o-'sadi' ki qafa mein

ab waris-e-mai-KHana-e-shiraaz hamin hain