ai baghban ye jabr hai ya iKHtiyar hai

ai bāġhbāñ ye jabr hai yā iḳhtiyār hai

murjhā rahe haiñ phuul chaman meñ bahār hai

shāyad isī kā naam ġham-e-rozgār hai

vo mil ga.e to aur bhī dil be-qarār hai

maiñ sāhab-e-chaman huuñ mujhe e'tibār hai

shām-e-ḳhizāñ ke baad hī sub.h-e-bahār hai

rahbar ne qāfile hī ko majbūr kah diyā

ab vo qadam baḌhā.e jise iḳhtiyār hai

kaliyāñ haiñ zard zard fazā.eñ haiñ sard sard

kuchh log kah rahe haiñ ye fasl-e-bahār hai

yuuñ to na ruk sakegā sitam kā ye silsila

jo kushta-e-sitam hai vahī sharmsār hai

dekhī haiñ maiñ ne baaġh kī vo hālateñ ki ab

mere liye ḳhizāñ kā na honā bahār hai

sābit huā ki raunaq-e-mahfil hai koī aur

mahfil jamī huī hai magar intizār hai

har sāhib-e-junūñ kā gulistāñ pe haq nahīñ

jis kā lahū bahā hai usī kī bahār hai

ai baghban ye jabr hai ya iKHtiyar hai

murjha rahe hain phul chaman mein bahaar hai

shayad isi ka nam gham-e-rozgar hai

wo mil gae to aur bhi dil be-qarar hai

main sahab-e-chaman hun mujhe e'tibar hai

sham-e-KHizan ke baad hi subh-e-bahaar hai

rahbar ne qafile hi ko majbur kah diya

ab wo qadam baDhae jise iKHtiyar hai

kaliyan hain zard zard fazaen hain sard sard

kuchh log kah rahe hain ye fasl-e-bahaar hai

yun to na ruk sakega sitam ka ye silsila

jo kushta-e-sitam hai wahi sharmsar hai

dekhi hain main ne bagh ki wo haalaten ki ab

mere liye KHizan ka na hona bahaar hai

sabit hua ki raunaq-e-mahfil hai koi aur

mahfil jami hui hai magar intizar hai

har sahib-e-junun ka gulistan pe haq nahin

jis ka lahu baha hai usi ki bahaar hai