ai bulbul-e-sahra chamanistan mein aa dekh

ai bulbul-e-sahrā chamanistān meñ aa dekh

kaliyoñ ke na.e Dhab se chaTakne kī adā dekh

fir.aun-sifat hoñToñ pe hārūn-bayānī

aur is pe bhī ḳhāmosh hai muusā kā ḳhudā dekh

phir bai'at-e-kam-zarf mohabbat se hai matlūb

sajne ko hai phir ek na.ī karb-o-balā dekh

ai rabb-e-zuleḳhā-o-ḳhudā-e-abū-yūsuf

ik husn ke maare hue do hijr-zada dekh

maiñ terā parastār huuñ aur tujh se ḳhafā huuñ

uThne ke nahīñ ab se mire dast-e-duā dekh

jis shaam ko barsoñ kī tavajjoh ne sañvārā

us shaam ke pahlū meñ hī kuchh TuuT gayā dekh

dam toḌ rahī lau ke anā-posh muhāfiz

kar degī barahna tujhe ik roz havā dekh

ai bulbul-e-sahra chamanistan mein aa dekh

kaliyon ke nae Dhab se chaTakne ki ada dekh

firaun-sifat honTon pe haarun-bayani

aur is pe bhi KHamosh hai musa ka KHuda dekh

phir bai'at-e-kam-zarf mohabbat se hai matlub

sajne ko hai phir ek nai karb-o-bala dekh

ai rabb-e-zuleKHa-o-KHuda-e-abu-yusuf

ek husn ke mare hue do hijr-zada dekh

main tera parastar hun aur tujh se KHafa hun

uThne ke nahin ab se mere dast-e-dua dekh

jis sham ko barson ki tawajjoh ne sanwara

us sham ke pahlu mein hi kuchh TuT gaya dekh

dam toD rahi lau ke ana-posh muhafiz

kar degi barahna tujhe ek roz hawa dekh